Зебур 95 - Мукъаддес Китап

Раббини шурет этмеге чагъырув

¹ РАББИге янъы бир йыр айтынъыз! Эй, бутюн ер юзю, РАББИге йырланъыз!

² РАББИге йырланъыз, Адыны алгъышланъыз, къуртарувыны кунь-куньден айтып беринъиз!

³ Шан-шуретини миллетлер арасында хабер этинъиз, аджайип шейлерини бутюн халкъларгъа бильдиринъиз!

⁴ Акъикъатен РАББИ улудыр! О, чокъ макътавларгъа ляйыкъ! Бутюн аллалардан зияде Ондан къоркъмакъ керек!

⁵ Халкъларнынъ бутюн аллалары – бош путлардыр, РАББИ исе коклерни яратты!

⁶ О, шан ве шурет ичинде, мукъаддес мескенинде – къудрет ве гузеллик!

⁷ Эй, халкъ къабилелери, РАББИни алгъышланъыз, РАББИнинъ шурети ве къудретини алгъышланъыз!

⁸ РАББИнинъ Адына ярашкъан шуретини беринъиз, бахшышлар кетирип, Онынъ азбарларына киринъиз!

⁹ Мукъаддес шуретинде олгъан РАББИге ибадет этинъиз! Бутюн ер юзю, Онынъ алдында титре!

¹⁰ Халкълар арасында бильдиринъиз: «РАББИ – Падишадыр!» Шунынъ ичюн дюнья къатты тура, о, къыбырдамаз асла. Халкъларны О, адалетнен укюм этеджек!

¹¹ Коклер севинсин, ер юзю къувансын, денъиз ве ичиндекилер гурьлесин!

¹² Тарлалар ве олардаки барлыкъ тантана этсинлер, ормандаки бутюн тереклер къуванчнен къычырсынлар!

¹³ Буны РАББИнинъ огюнде этсинлер! О, мында келе, ерни укюм этмеге келе! О, дюньяны Озь адалетинен, дюнья халкъларыны акъикъатынен укюм этеджек!