Зебур 94 - Мукъаддес Китап

Шукюр йыры

¹ Айдынъыз, келейик, РАББИге юксек сеснен йырлайыкъ! Бизим Къуртарыджы Къаямызны алгъышлап къычырайыкъ!

² Онынъ янына шукюр сёзюнен якъынлашайыкъ, Онъа къуванчнен багъырып йырлайыкъ!

³ РАББИ – улу Алладыр, бутюн аллалардан устюн улу Падишадыр!

⁴ Ернинъ теренликлери Онынъ къолундадыр, дагълар тёпелери де Онынъки.

⁵ Денъиз Онынъ, чюнки оны Озю яратты, топракъны да Онынъ къоллары япты.

⁶ Айдынъыз, келейик, Онъа бель букип ибадет этейик, бизни яраткъан РАББИнинъ огюнде тиз чёкейик!

⁷ О, бизим Алламыздыр, бизлер исе – Онынъ яйласынынъ халкъы, Онынъ къолундаки къойлармыз. Эгер бугунь Онынъ сесине къулакъ аскъан олсанъыз!

⁸ «Сахрада Меривада олгъаны киби ве шу куню Массада олгъаны киби юрегинъизни таш этменъиз!

⁹ О ерде бабаларынъыз Мени сынавдан кечирдилер, ишимни корьген олсалар да, Мени сынадылар.

¹⁰ Къыркъ йыл бу несиль мени ачувландыра эди. “Бу халкънынъ юреги адашкъан, олар Меним ёлларымны бильмегенлер”, – дедим Мен.

¹¹ Шунынъ ичюн Мен гъазапланып ант эттим: “Олар мытлакъа Меним раатлыкъ ериме кирмейджеклер”».