Зебур 92 - Мукъаддес Китап

Раббини шурет этмеге чагъырув

¹ РАББИ – Падишадыр! О, улулыкъкъа кийинген! РАББИ къудретке кийинген ве онен къушангъан! Акъикъатен, дюнья къатты тура ве ич сарсылмаз!

² Сенинъ тахтынъ къадимий замандан берли пекитильген, Сен – асырлардансынъ!

³ Озенлер котериле, я РАББИ, озенлер сесини котере, озенлер буюк далгъаларыны котере.

⁴ Чокъ сувларнынъ шувултысындан, денъизнинъ кучьлю далгъаларындан юкъарыдаки РАББИ кучьлюдир!

⁵ Сенинъ шаатлыкъларынъ пек ишанчлыдыр, Эвинъе эбедий мукъаддеслик яраша, я РАББИ!