Зебур 91 - Мукъаддес Китап

Шукюр йыры

¹ Зебур. Раатлыкъ куню ичюн йыр.

² Не де яхшыдыр РАББИни шуретлемек, Сенинъ Адынъа чалгъы чалмакъ, Юдже Алла!

³ Саба – буюк севгинъни хабер этмек, гедже исе – ишанчлы олгъанынъны!

⁴ Он телли алет ве арфа чалып, сантырны чалып йырламакъ яхшы!

⁵ Я РАББИ, Озь ишлеринънен мени къувандырдынъ, яраткъанларынъдан севинчнен къычырам!

⁶ Ишлеринъ не къадар буюктир, я РАББИ! Пек терендир Сенинъ тюшюнджелеринъ!

⁷ Акъылы етмеген адам буны бильмез, ахмакъ да буны анъламаз.

⁸ Ярамайларнынъ от киби пейда олгъаны, акъсызлыкъ япкъанларнынъ гуль ачкъаны – оларнынъ эбедий ёкъ олувы ичюндир.

⁹ Лякин Сен, я РАББИ, эбедиен Юджесинъ!

¹⁰ Душманларынъ, я РАББИ, душманларынъ мытлакъа ёкъ олур, акъсызлыкъ япкъанларнынъ эписи даркъалып кетер!

¹¹ Лякин кийик бугъа насыл бойнузыны котерип юрсе, Сен башымны шойле котерип юрсетирсинъ! Меним башыма тазе зейтюн ягъыны якътылар.

¹² Душманларым йыкъылгъаныны озь козюмнен корьдим, манъа къаршы чыкъкъан яман душманнынъ къычыргъаныны озь къулагъымнен эшиттим.

¹³ Инсафлы адам хурма тереги киби гуль ача, Ливандаки кедр тереги киби юкселип осе.

¹⁴ РАББИнинъ Эвинде сачылгъан адамлар Алламызнынъ азбарларында гуль ачарлар.

¹⁵ Олар къартайгъанда да, чокъ мейва берерлер, тазе ве ешиль олурлар,

¹⁶ РАББИнинъ догърулыгъыны хабер этерлер, «Къаям О, Онда ялан ёкъ», – дерлер!