Зебур 88 - Мукъаддес Китап

Аллагъа садыкъ падиша

¹ Эзрахлы Этаннынъ маскили.

² Я РАББИ, Сенинъ буюк севгинъ акъкъында эбедиен йырлайджагъым, акъикъатынъны бутюн несиллерге бильдиреджегим!

³ Севгинъ эбедиен къатты турар, дедим; акъикъатынъны коклерде ерлештирдинъ!

⁴ «Мен Озь сайлагъаныма васиет бердим, къулум Давуткъа ант эттим:

⁵ Сенинъ союнъ эбедиен кесильмез, эвлятларынъ несиллернинъ эписине падишалыкъ этер». Сэла

⁶ Я РАББИ, коклер Сенинъ аджайип ишлеринъни шуретлер, азизлер топлашувында акъикъатынъны макътарлар!

⁷ Коклерде РАББИге тенъ бармы? Алланынъ огъуллары арасында РАББИ киби сою бармы?

⁸ Азизлернинъ буюк топлашувында Алла къоркъунчлы, этрафындакилернинъ эписи ичюн О, къоркъунчлыдыр.

⁹ Я РАББИ, Ордуларнынъ Алласы! Сен киби къудретли кимдир, я РАББИ? Акъикъатынъ бутюн этрафынъны сарды!

¹⁰ Сен къутургъан денъизге падишалыкъ этесинъ, далгъалары котерильгенде, оларны Сен тынчландырасынъ.

¹¹ Сен Рахавны тар-мар этип, олюм алына кетирдинъ, кучьлю къолунънен душманларынъны дагъыттынъ.

¹² Коклер – Сенинъ, ер де Сенинъ, дюнья ве онынъ барлыгъыны Сен яраттынъ.

¹³ Шималь ве дженюп тарафларыны Сен яраттынъ, Тавор ве Хермон дагълары Адынъа къуванчнен къычыралар.

¹⁴ Сенинъ къолларынъ къавий, къолунъ кучьлю, онъ къолунъ юксектир!

¹⁵ Тахтынънынъ темели – адалет ве догърулыкъ, севгинен садыкълыкъ – эр даим алдынъда.

¹⁶ Не де бахтлыдыр бору сесини бильген халкъ, олар Сенинъ юзюнъ ярыгъында юрерлер!

¹⁷ Адынъа халкъ бутюн кунь севинир, адалетинънен юкъарыгъа котерилир!

¹⁸ Оларнынъ къувети – Сенсинъ, Сенинъ разылыгъынънен бизим союмыз гъалебе къазаныр!

¹⁹ Керчектен, бизим къалкъанымыз – РАББИнинъкидир, падишамыз – Исраильнинъ Азизининъкидир.

²⁰ Бир вакъытта Сен Озь азизлеринъе руяда дединъ: «Мен бир джесюрге ярдым ёлладым, халкъ арасындан сайлангъанны юксельттим.

²¹ Къулум Давутны таптым, мукъаддес ягънен оны якътым.

²² Къолум эбедиен онен оладжакъ, Озюм онъа кучь береджегим.

²³ Душман оны енъип оламаз, къанун бозгъаннынъ огълу онъа зулум эталмаз.

²⁴ Душманларыны онынъ козю огюнде къыраджагъым, ондан нефрет эткенлерни ураджагъым.

²⁵ Меним акъикъатым ве севгим онен, Меним Адымнен о, енъеджек.

²⁶ Онынъ къолуны денъиз устюне, онъ къолуны – озенлер устюне къояджагъым».

²⁷ О, мени чагъырып, дейджек: «Сен меним Бабамсынъ, Алламсынъ, меним къуртарыджы Къаямсынъ!»

²⁸ Мен оны биринджи огълум япарым, дюнья падишаларындан юкъары къоярым.

²⁹ Онъа севгимни эбедиен сакъларым, онъа берген васиетим бозулмаз.

³⁰ Онынъ сою эбедиен кесильмез, онынъ падишалыкъ этювини коклернинъ куньлери киби девам эттиририм.

³¹ «Эгер онынъ огъуллары къанунларымны къалдырып, къарарларыма коре юрмеселер,

³² эгер Меним къаиделеримни бозып, эмирлеримни тутмасалар,

³³ акъсызлыгъы ичюн оларны таягъымнен, къабаатлары ичюн – котекнен джезаларым.

³⁴ Лякин Озь севгимни ондан алмам, садыкълыгъымны да денъиштирмем,

³⁵ Озь васиетимни бозмам, берген сёзюмден къайтмам.

³⁶ Бир кере мукъаддеслигимнен ант эттим, – Давуткъа ялан айтарыммы?

³⁷ Онынъ сою эбедиен кесильмез, тахты къаршымда кунеш киби турар!

³⁸ Кок юзюндеки догъру шаат олгъан ай киби, о, эбедиен къатты олып турар!» Сэла

³⁹ Амма энди Сен ред эттинъ, юзь чевирдинъ, Озь Месихинъе пек гъазапландынъ,

⁴⁰ къулунъа берген васиетинъден вазгечтинъ, Онынъ таджыны топракъкъа аттынъ.

⁴¹ Бутюн къораларыны йыкътынъ, къалелерини харабеге чевирдинъ.

⁴² Ёлдан кечкенлер эписи оны талай, къомшуларынынъ алдында о масхара олды.

⁴³ Онъа къаршы чыкъкъанларгъа Сен гъалебе бердинъ, бутюн душманларыны къувандырдынъ.

⁴⁴ Къылычынынъ уджуны къайтардынъ, дженкте онъа кучь бермединъ.

⁴⁵ Онынъ йылтыравыны битирдинъ, тахтыны исе ерге урдынъ,

⁴⁶ Яшлыкъ куньлерини къыскъарттынъ, оны пек утандырдынъ. Сэла.

⁴⁷ Не вакъыткъадже, я РАББИ, Озюнъни эбедий сакъларсынъ? Не вакъыткъадже гъазабынъ атеш киби янар?

⁴⁸ Омрюм не къадар къыскъа экенини хатырла! Инсан огъулларыны бошуна яраттынъмы?

⁴⁹ Яшагъан да, олюмни корьмеген адам бармы? Олюлер дюньясындан джаныны къуртаргъан инсан бармы? Сэла

⁵⁰ Эвельки буюк севгинъ къаерде къалды, я РАББИ? Давуткъа Озь садыкълыгъынънен ант эткен эдинъ.

⁵¹ Къулларынъ не къадар масхара олгъаныны, бутюн къудретли халкъларнынъ акъаретини ичимде насыл ташыгъанымны хатырла, я РАББИ!

⁵² Душманларынъ насыл сёггенлерини, Месихинънинъ излерини мыскъыллагъанларыны унутма, я РАББИ!

⁵³ РАББИни эбедиен алгъышланъыз! Амин! Амин!