Зебур 87 - Мукъаддес Китап

Аджыныкълы ярдым сорав

¹ Йыр. Къорах огъулларынынъ зебуры. Баш чалгъыджы ичюн. Аль-махалат леаннот. Эзрахлы Хеманнынъ маскили.

² Я РАББИ, Алла-Къуртарыджым, гедже-куньдюз Санъа фигъан къопарам.

³ Дувам алдынъа етип барсын, меним фигъаныма къулакъ ас!

⁴ Мусибетлерден джаным тойды, олюлер дюньясына аятым якъынлашты.

⁵ Мезаргъа кетеяткъанларнен бир олдым, кучьтен кесильген адам киби олдым.

⁶ Олюлер арасына ташлангъаным, мезарда яткъан джесетлер киби. Сен оларны энди хатырламайсынъ, олар тюшип кеткен къолунъдан.

⁷ Сен мени энъ терен чукъургъа къойдынъ, къаранлыкъ, тюпсюзлик ичине ташладынъ.

⁸ Гъазабынъ устюме агъыр юк киби чёкти, бутюн далгъаларынънен мени эзип ташладынъ. Сэла

⁹ Танышларымны менден узакълаштырдынъ, мени олар ичюн игренч яптынъ; мен къапалдым, чыкъып оламайым.

¹⁰ Яныкътан козьлерим зайыфлашты. Я РАББИ, Сени бутюн кунь чагъыра эдим, къолларымны Санъа таба узаттым.

¹¹ Олюлерге аджайип шей косьтереджексинъми? Олюлернинъ рухлары турып, Сени шуретлейджеклерми? Сэла

¹² Мезарда Сенинъ севгинъ илян этилирми? Сенинъ садакъатынъ олюм еринде олурмы?

¹³ Къаранлыкъта Сенинъ аджайип ишлеринъни, унутылгъан дюньяда Сенинъ догърулыгъынъны биледжеклерми?

¹⁴ Амма мен Сенден ярдым истейим, я РАББИ, саба эрте дувам Сени къаршылай.

¹⁵ Я РАББИ, не ичюн джанымны ред этесинъ? Не себептен менден юзь чевиресинъ?

¹⁶ Мен гъарип, яшлыгъымдан башлап сёнем, Сенинъ дешетли шейлеринъни чектим, умют джойдым.

¹⁷ Гъазабынъ меним башыма тюшти, Сенинъ къоркъузгъанынъ мени йыкътырды.

¹⁸ Сув киби олар мени эр кунь саралар, эписи мени алкъагъа алалар.

¹⁹ Севгилилеримни ве достларымны Сен менден узакълаштырдынъ, меним танышларым къаранлыкъта.