Зебур 85 - Мукъаддес Китап

Къаарь кунюнде ярдым дувасы

Давутнынъ дувасы.

¹ Къулагъынъны меним тарафыма тутып, манъа джевап бер, я РАББИ, чюнки мен заваллы ве факъырым.

² Джанымны сакъла, чюнки мен Сенден къоркъам. Санъа умют багълагъан къулунъны къуртар, я РАББИ!

³ Манъа мерамет эт, Рабби, мен эр кунь Санъа ялварам.

⁴ Къулунънынъ джаныны къувандыр, чюнки Санъа, я Рабби, джаным ынтыла.

⁵ Сен, Рабби, хайырлы багъышлайыджысынъ, Сени чагъыргъанларнынъ эписине буюк севгинъни ачасынъ!

⁶ Меним дувамны эшит, я РАББИ, ялваргъан сесиме къулакъ ас!

⁷ Мусибет кунюнде Сени чагъыраджагъым, ве Сен манъа джевап береджексинъ.

⁸ Аллалар арасында Санъа ошагъаны ёкъ, ишлеринъе тенъ кельгени де ёкъ, я Рабби!

⁹ Сен яраткъан бутюн халкълар келип, Сенинъ алдынъда бель букеджеклер ве Адынъны шуретлейджеклер, я Рабби!

¹⁰ Сен улусынъ, аджайип шейлер япасынъ. Ялынъыз Сен – Алласынъ.

¹¹ Озь ёлунъны манъа огрет, я РАББИ, Сенинъ акъикъатынъа коре юреджегим; Адынъдан къоркъмакъ ичюн юрегимни къавий эт!

¹² Рабби-Тааля, джан-юректен Санъа шукюр этеджегим, эбедиен Адынъны шуретлейджегим!

¹³ Сен манъа буюк севгинъни косьтердинъ, олюлер дюньясынынъ чукъурындан джанымны къуртардынъ!

¹⁴ Аллам, къопай адамлар манъа къаршы котерильди, джанаварлар ордусы джанымны къыдыра; олар Сени акъылына биле кетирмейлер!

¹⁵ Амма Сен, Рабби, шефкъатлы ве мераметлисинъ, пек сабырлы, чокъ севген ве ишанчлысынъ!

¹⁶ Манъа бакъып, аджы мени, Озь къулунъны къуветлендир, къул-къадынынънынъ огълуны къуртар!

¹⁷ Разылыгъынънынъ бельгисини манъа косьтер, оны менден нефрет эткенлер корьсюн ве масхара олсунлар! Сен, РАББИ, манъа ярдым эттинъ ве меним гонълюмни алдынъ!