Зебур 83 - Мукъаддес Китап

Раббининъ Эвинде олмагъа истек

¹ Баш чалгъыджы ичюн. Аль-хаггиттит. Къорах огъулларынынъ зебуры.

² Ордуларнынъ РАББИси, Сенинъ мескенлеринъ не къадар гузельдир!

³ РАББИнинъ азбарларыны сагъынып, джаным тарсыкъа, юрегим, беденим Тири Аллагъа къуванчнен къычыра!

⁴ Сенинъ къурбан ерлеринъ янында къушчыкъ биле озюне ер ве къарылгъач балалары ичюн юва тапа, Ордуларнынъ РАББИси, меним Падишам ве Аллам!

⁵ Не де бахтлыдыр Сенинъ эвинъде яшагъанлар! Олар токътамайып Сени макътайджакълар! Сэла

⁶ Не де бахтлыдыр кучюни Сенде тапкъан, юрек сокъакълары Сенинъ тарафынъа бакъкъанлар!

⁷ Агълав вадийинден кечкенде, анда чешмелерни ачар, ягъмур анда ягъып, берекет берер.

⁸ Оларнынъ кучюне кучь къошулыр, Сионда Алланынъ огюнде олар корюнир!

⁹ Ордуларнынъ РАББИ-Таалясы, меним дувамны динъле! Къулакъ ас, эй, Якъупнынъ Алласы! Сэла

¹⁰ Эй, Алла, бизим Къалкъанымызгъа бакъ, Месихинънинъ бетини корь!

¹¹ Сарайынънынъ азбарында кечкен бир кунь башкъа бинъ куньден яхшыдыр! Ярамайларнынъ чадырларында яшагъанымдан Алла Сарайынынъ босагъасы янында тургъаным яхшыдыр!

¹² РАББИ-Тааля – кунеш ве къалкъандыр; хайыр ве шуретни РАББИ багъышлар, къабаатсыз ёлларнен юргенлерден О, эйиликни айырмаз!

¹³ Ордуларнынъ РАББИси, не де бахтлыдыр Санъа ишангъан инсан!