Зебур 82 - Мукъаддес Китап

Душманларны магълюбиетке огъраткъан дува

¹ Йыр. Асафнынъ зебуры.

² Эй, Алла, индемей турма, сесинъни кесме, арекетсиз къалма, эй, Алла!

³ Мына, Сенинъ душманларынъ шамата къопара, Сенден нефрет эткенлер баш котерелер.

⁴ Сенинъ халкъынъа къаршы фитнеджилик япалар, Сен къорчалагъан адамларынъа къаршы акъыл танышалар.

⁵ «Барайыкъ да, оларны халкълар сырасындан ёкъ этейик, Исраильнинъ ады башкъа хатырланмасын!» – дедилер.

⁶ Олар бир юрек олып, Санъа къаршы анълашма тиздилер.

⁷ Мына, Эдом ве Исмаилнинъ чадырлары, Моав ве хагрийлилер,

⁸ Гивал, Аммон ве Амалек огъуллары, фелестинлилер эм де Тир сакинлери.

⁹ Ашшур да оларгъа къошулып, Лут огъулларына кучь берди. Сэла

¹⁰ Сен Кишон вадийинде мидьянлыларгъа, Сисера ве Явинге япкъанынъны оларгъа да яп.

¹¹ Олар Эн-Дорда ёкъ этильди, топракъ ичюн кубре олды.

¹² Орев ве Зеевге япкъанынъны оларнынъ мырзаларына яп, Зевах ве Цалмуннагъа не япкъан олсанъ, оларнынъ бутюн башлыкъларына да шойле яп.

¹³ «Алланынъ мескенлерини озюмизге мульк этип алайыкъ!» – деген эди олар.

¹⁴ Эй, Аллам, олар савурылгъан тоз киби, ельнинъ огюне тюшкен тобан киби олсунлар.

¹⁵ Атеште дагълар янгъаны киби, алев къаяларны куйдюрген киби,

¹⁶ Сен боран чагъырып оларны айда, башларына туфан кетирип, къоркъуз.

¹⁷ Олар Сенинъ Адынъны къыдырсынлар деп, бетлерини утанчнен къапла, я РАББИ!

¹⁸ Олар эбедий масхара олып, къоркъугъа далсынлар, резиль олып, ёкъ олсунлар!

¹⁹ Эм де бильсинлер: Сенинъ Адынъ – РАББИ, бутюн дюньяда ялынъыз Сен – Юдже Алласынъ!