Зебур 81 - Мукъаддес Китап

Алла – баш Къады!

Асафнынъ зебуры.

¹ Алла, аллаларнынъ топлашувында турып, аллалар арасында къарар чыкъара.

² «Не вакъыткъадже сиз адалетсиз суд этерсиз, ярамай адамларгъа кулер юзьнен бакъарсыз? Сэла

³ Фукъаре ве оксюзнинъ тарафыны алынъыз, заваллы ве факъыргъа адалет косьтеринъиз!

⁴ Фукъаре ве факъырны къорчаланъыз, ярамайларнынъ къолундан азат этинъиз оларны!

⁵ Олар бильмейип ве анъламайып къаранлыкъта юрелер; атта ер юзюнинъ темеллери сарсыла.

⁶ Мен айттым: “Сиз аллаларсынъыз, эпинъиз Юдже Алланынъ огъулларысынъыз!”

⁷ Лякин инсан киби оледжексинъиз, эр бир башлыкъ киби тюшеджексинъиз!»

⁸ Тур, эй, Алла, ер юзюни укюм эт, бутюн халкълар Сенинъкидир!