Зебур 80 - Мукъаддес Китап

Байрам йыры

1 Баш чалгъыджы ичюн. Аль-хаггиттит. Асафнынъ зебуры .

¹ Баш чалгъыджы ичюн. Аль-хаггиттит. Асафнынъ зебуры.

² Бизге кучь берген Аллагъа къуванчнен йырланъыз! Якъупнынъ Алласына севинчнен къычырынъыз!

³ Чалгъы ачынъыз, даре урунъыз, татлы сесли сантыр ве арфаны чалынъыз!

⁴ Янъы ай пейда олгъан куню бору чалынъыз, толу ай куню, байрамымыз кунюнде!

⁵ Бу – Исраильге къанундыр, Якъуп Алласынынъ ферманыдыр.

⁶ Алла Мысыр топрагъына къаршы чыкъкъанда, О, буны Юсуфкъа шаатлыкъ этип берди. Анда мен анъламагъан бир тиль эшиттим.

⁷ «Онынъ елькесиндеки юкни енгиллештирдим, къоллары сепетлерден къуртулды.

⁸ Белялы куньде Мени чагъырдынъ, ве Мен сени къуртардым, гурюльдеген кок ичинден санъа джевап бердим, Мерива сувларында сени сынадым». Сэла

⁹ «Динъле, халкъым, Мен санъа шаатлыкъ этеджегим, эй, Исраиль, эгер сен Мени динълеген олсанъ!

¹⁰ Аранъызда башкъа алла олмасын, ят халкънынъ алласына бель букме.

¹¹ РАББИ олгъан Алланъ – Меним, Мен сени Мысыр топрагъындан алып чыкътым. Агъзынъны кенъдже ач, Мен оны толдураджагъым!

¹² Амма халкъым лафыма къулакъ асмады, Исраиль Манъа бойсунмагъа истемеди.

¹³ Шунынъ ичюн Мен оларны инат юреклеринен къалдырдым, бильгенлери киби яшасынлар, дедим.

¹⁴ Къана, эгер халкъым Манъа къулакъ асса, Исраиль Меним ёлларымдан юрсе,

¹⁵ душманларыны бир аньде енъер эдим, зулум эткенлернинъ устюне къолумнен басар эдим!

¹⁶ РАББИден нефрет эткенлер Онъа боюн эгер эдилер, оларнынъ вакътына сонъ олмаз эди!

¹⁷ Оларгъа энъ яхшы богъдайны ашаттырыр эдим, къаядан бал акъыздырып, оларны тойдурыр эдим!»