Зебур 79 - Мукъаддес Китап

Исраильнинъ гъайрыдан тикленюви ичюн дува

¹ Баш чалгъыджы ичюн. «Шошаним-эдут» авасында. Асафнынъ зебуры.

² Эй, Исраильнинъ Чобаны, динъле! Озюнъни косьтер, эй, Юсуфны сюрю киби етеклеген, Керувлар устюнде отургъан Алла!

³ Эфраим, Биньямин, Менашше эвлятларынынъ алдында Озь къудретинъни косьтер, бизни къуртармагъа кель!

⁴ Эй, Алла, бизни Озюнъе къайтар, Сенинъ юзюнъ парылдасын, сонъ бизлер къуртулырмыз!

⁵ Ордуларнынъ РАББИ-Таалясы, не вакъыткъадже халкъынънынъ дуваларына ачувланаджакъсынъ?

⁶ Сен оларгъа козьяшлы отьмек ашаттынъ, къаде-къаде козьяшыны ичирдинъ.

⁷ Къомшуларымызнынъ бизнен талашкъанына себеп олдынъ, душманларымыз бизни мыскъыллай.

⁸ Эй, Ордуларнынъ Алласы, бизни Озюнъе къайтар, Сенинъ юзюнъ парылдасын, сонъ бизлер къуртулырмыз!

⁹ Мысырдан юзюм чубугъыны кетирдинъ, халкъларны къувып, оны сачтынъ.

¹⁰ О ичюн ер азырлагъан эдинъ, о да терен тамыр атып, бутюн ерни къаплады.

¹¹ Дагълар онынъ кольгесининъ тюбюнде къалды, онынъ пытакълары Алланынъ кедр тереклери киби.

¹² Онынъ пытакълары денъизге къадар, филислери исе дерьягъа етти.

¹³ Не ичюн Сен онынъ диварларыны боздынъ? Кечкен-кеткен эр бир ордулар онынъ юзюмини къопара.

¹⁴ Кийик домузлар онынъ тамырыны кемире, тарла айванлары да оны ашай.

¹⁵ Эй, Ордуларнынъ Алласы, бизге къайтып кельсе! Коктен бакъып, алымызны корь, шу багъны сакъла!

¹⁶ Онъ къолунънен сачкъан чубукъны, Озюнъ ичюн пекиткен пытакъны къорчала!

¹⁷ Мына, оны кесип, атешке ташлайлар, олар Сенинъ гъазабынъдан ёкъ оладжакъ!

¹⁸ Элинъ онъ къолунъ олгъан акъайнынъ устюнде, Озюнъ ичюн пекиткен инсан огълунынъ устюнде олсун!

¹⁹ Биз энди Сенден юзь чевирмемиз, джанландыр бизни, ве биз Сенинъ Адынъны чагъырырмыз.

²⁰ Ордуларнынъ РАББИ-Таалясы, бизни Озюнъе къайтар, Сенинъ юзюнъ парылдасын, сонъ бизлер къуртулырмыз!