Зебур 78 - Мукъаддес Китап

Исраильнинъ къуртулышы ичюн окъулгъан дува

Асафнынъ зебуры.

¹ Эй, Алла, халкълар Сенинъ мирасынъны басып алдылар, Мукъаддес Сарайынъны арам эттилер, Ерусалимни харабеге чевирдилер.

² Къулларынънынъ джесетлерини ем ичюн кок къушларына, азизлеринънинъ этини ер юзюнинъ кийик айванларына бердилер.

³ Ерусалимнинъ этрафында оларнынъ къаныны сув киби тёктилер, оларны дефн этмеге ич бир адам къалмады.

⁴ Къомшуларымыз бизни масхара этелер, этрафымыздакилер бизни мыскъыллайлар ве акъарет этелер.

⁵ Я РАББИ, не вакъыткъадже токътамайып ачувланаджакъсынъ? Не вакъыткъадже куньджюлигинъ янаджакъ?

⁶ Сени танымагъан халкъларнынъ устюне, Адынъны чагъырмагъан падишалыкъларгъа гъазабынъны тёк.

⁷ Олар Якъупны ашап юттылар, онынъ юртуны виран эттилер.

⁸ Бабаларымызнынъ гуналарыны бизге хатырлатма, якъында шефкъатынъ бизим тарафымызгъа айлансын, чюнки биз пек зайыфлаштыкъ.

⁹ Эй, Алла, Къуртарыджымыз, Намынъ шуретли олсун деп, бизге ярдым эт, Озь Адынънынъ хатири ичюн бизни къуртар, гуналарымызны багъышла!

¹⁰ Не ичюн башкъа халкълар: «Оларнынъ Алласы къайда?» – десин? Къулларынънынъ тёкюльген къанлары ичюн Сен очь алырсынъ; халкъларнынъ арасында шу шей белли олсун, оны козьлеримиз де корьсюн!

¹¹ Эсирлернинъ инъильтиси Сенинъ къулагъынъа етсин; олюмге суд этильген адамларны буюк къудретинънен сакъла!

¹² Я Рабби, къомшуларымызнынъ Санъа япкъан акъаретлерини еди кере чокълаштырып, озьлерининъ ичлерине къайтар!

¹³ Сенинъ халкъынъ ве отлагъынънынъ къойлары олып исе, бизлер Сени эбедиен шуретлейджекмиз, несильден несильге Сени макътайджакъмыз!