Зебур 77 - Мукъаддес Китап

Алла ве Онынъ халкъы

Асафнынъ маскили.

¹ Эй, халкъым, Къануныма дикъкъат эт, агъзымдан чыкъкъан сёзлериме къулакъ асынъыз!

² Агъзымны ачып, кинаели икяе айтарым, къадимий сырларны беян этерим:

³ эшиткен ве бильгенлеримизни ве бабаларымыз бизге айткъанларыны.

⁴ Оларны огъулларындан гизлемемиз, келеджек несильге хабер этермиз РАББИнинъ шурети ве буюк къудретини, Онынъ косьтерген аджайип шейлерини.

⁵ О, Якъуп ичюн шаатлыкъ берди, Исраиль ичюн Къанунны къойды, оны огъулларына огретмеге бабаларымызгъа буюрды.

⁶ Келеджек несиль, догъуладжакъ балалар да оны бильсин, олар исе озь вакътында огъулларына огретсин.

⁷ Олар Аллагъа умют багъласынлар, Алла яраткъан шейлерни унутмасынлар, Онынъ эмирлерини беджерсинлер.

⁸ Бабаларымыз киби инат ве исьянджы, юреклери вефалы олмагъан, рухлары Аллагъа садыкъ олмагъан несиль олмасынлар.

⁹ Окълар ве яйнен силялангъан Эфраимнинъ огъуллары дженк кунюнде арткъа къайттылар.

¹⁰ Олар Алла берген васиетни тутмадылар, О ёллагъан Къанун ёлундан кетмеге истемедилер.

¹¹ Онынъ ишлерини эслеринден чыкъардылар, косьтерген аджайип шейлерини унуттылар.

¹² Мысыр топрагъында, Цоан тарласында, оларнынъ бабалары огюнде Алла аджайип шейлер косьтерген эди:

¹³ денъизни ярды, ортасындан оларны кечирди, сувларны бир дивар киби къойды.

¹⁴ Куньдюз булутнен оларны етекледи, гедже исе атеш ярыгъынен ёл косьтере эди.

¹⁵ Олар ичюн сахрада ташны ярып, санки тюпсюз чокъракътан сув чыкъарып берди.

¹⁶ О, къаядан сувларны акъыздырды, олар озенлер киби акъып кетти.

¹⁷ Амма олар Онъа къаршы гуна япмакъны девам этти, къуру чёльде Юдже Алланы гъазапландырды.

¹⁸ Джанлары истеген ашны талап этти, юреклеринде Алланы сынап бакъты.

¹⁹ Аллагъа къаршы айтып, шойле дедилер: «Алла сахрада софра къурып олурмы?»

²⁰ Мына, О, къаяны урды, сувлар чыкъты, ирмакълар акъып башлады. «Озь халкъына отьмек де бере билирми, этни де азырлап олурмы?»

²¹ РАББИ буларны эшитип гъазапланды, Якъупнынъ устюне атеш тюшти, Исраильге къаршы ачувы котерильди.

²² Олар Аллагъа инанмадылар, Онынъ къуртарувына ишанмадылар.

²³ О, юкъарыдаки булутларгъа эмир этти, кок къапуларыны ачып ташлады.

²⁴ Ашамакъ ичюн оларгъа манна ягъдырды, оларгъа коктеки отьмекни берди.

²⁵ Адамлар мелеклернинъ отьмегини ашады; О, оларгъа тойгъандже аш ёллады.

²⁶ Кок юзюнден О, шаркъ елини къозгъады, къудретинен дженюп елини эстирди.

²⁷ Оларнынъ устюне тоз киби этни ягъдырды, денъиздеки къум къадар къанатлы къуш берди.

²⁸ Оларнынъ ордулары ортасында, чадырлары этрафында буларны ягъдырды.

²⁹ Олар тоя-тоя ашадылар, истегенлери къадар О, оларгъа берди.

³⁰ Амма мадделери даа кесильмеди, ашлары даа агъызларында эди,

³¹ Алланынъ ачувы башларына тюшти, О, энъ кучьлюлерини ольдюрди, Исраиль йигитлерини къырды.

³² Бунъа бакъмадан, олар кене гуна яптылар, РАББИнинъ аджайип ишлерине инанмадылар.

³³ О, оларнынъ куньлерини бошлукъта, омюр йылларыны дешет ичинде битирди.

³⁴ Алла оларны ольдюргенинен, олар Оны къыдырып башлады; олар къайтып, Аллагъа чапып кельди,

³⁵ Алла оларнынъ къаясы олгъаныны, Юдже Алла оларнынъ Къуртарыджысы олгъаныны хатырладылар.

³⁶ Агъызларынен Онъа ялтакъландылар, тиллеринен Онъа ялан айттылар.

³⁷ Онынъ алдында юреклери къыйыш эди, буюргъан васиетине садыкъ олмадылар.

³⁸ Амма О, шефкъатлы эди, гуналарыны багъышлап, оларны ёкъ этмеди. Чокъ кере ачувыны олардан къайтарып, бутюн гъазабыны бирден тёкмеди.

³⁹ Олар – кечип кеткен вуджуттыр, чыкъып кетип, къайтып кельмез нефес киби олгъанлары Онынъ акъылында эди.

⁴⁰ Не къадар сахрада Оны ачувландырдылар, бош чёльде Оны акъарет эттилер!

⁴¹ Олар Алланы къайта-къайта сынадылар, Исраильнинъ Мукъаддес Алласынынъ джаныны агъырттылар.

⁴² Олар Онынъ къудретини, оларны зулумдан къуртаргъан кунюни хатырламадылар.

⁴³ Онынъ Мысырда косьтерген бельгилерини, Цоан тарласында косьтерген аджайип шейлерини эслеринден чыкъардылар.

⁴⁴ О, оларнынъ озенлерини къангъа айландырды, олар ичмеге акъкъан сув тапалмадылар.

⁴⁵ Оларны тишлесин деп, боджеклерни ёллады, гъайып этсин деп, къыр бакъаларыны ёллады.

⁴⁶ Оларнынъ ер махсулларыны сарынчкъаларгъа берди, эмеклерининъ нетиджесини чегерткилерге берди.

⁴⁷ Юзюмлерини бурчакънен урды, инджир тереклерини бузнен гъайып этти.

⁴⁸ Малларынынъ башына бурчакъ ягъдырды, сюрюлерини йылдырым атешине берди.

⁴⁹ Оларгъа къаршы буюк гъазабы, хышымы, ачувыны ве беляларны, – бир талай яман эльчилерни ёллады.

⁵⁰ Алла Озь гъазабына ёл ачты, оларнынъ джанларыны олюмден сакъламады, ольдюриджи хасталыгъына джанларыны берди.

⁵¹ Мысырда бутюн биринджи догъгъан балаларны ольдюрди, Хамнынъ чадырларындаки бабаларнынъ гъурурыны ёкъ этти.

⁵² Алла Озь халкъыны къой-эчкилер киби айдап чыкъарды, сахрада оларны сюрю киби етеклеп барды.

⁵³ Оларны сагъ-селямет юрсетти, бир шейден къоркъмадылар, душманлары исе денъизге батты.

⁵⁴ Оларны Озюнинъ мукъаддес топрагъына, Онъ къолу алгъан бу дагъгъа кетирди.

⁵⁵ Озь алдындан башкъа халкъларны къувып чыкъарды, Исраиль къабилелерине о ерни мирас этип берди, бошалгъан чадырларда оларны ерлештирди.

⁵⁶ Олар исе але даа Юдже Алланы сынап, Онынъ джаныны агъырттылар, Онынъ шаатлыкъларыны сакъламадылар.

⁵⁷ Бабалары киби артына къайтып, хаинлик яптылар, окъу джоюлгъан яй киби бозукъ чыкътылар.

⁵⁸ Озь ибадет тёпелеринде табынып, Онынъ джаныны агъырттылар, путларынен Оны куньлемеге меджбур эттилер.

⁵⁹ Алла буны эшитип, пек гъазапланды ве Исраильни бутюнлей ред этти.

⁶⁰ Адамлар арасында Озю яшагъан чадырыны, Шилода къургъан мескенини ташлап кетти.

⁶¹ Къудретини эсирликке, Озь гузеллигини душман къолуна берди.

⁶² Озь халкъыны къылычкъа теслим этти, ачувыны Озь мирасындан чыкъарды.

⁶³ Оларнынъ йигитлерини атеш ютты, къызларына никях йырларыны айтмадылар.

⁶⁴ Руханийлери къылычтан ольди, тул апайлары агълап оламады.

⁶⁵ О вакъытта Рабби юкъудан киби турды, шараптан енъильген батыр киби уянды.

⁶⁶ Душманларыны аркъасындан урды, оларны эбедиен масхара этти.

⁶⁷ Алла Юсуфнынъ чадырыны ред этти, Эфраимнинъ къабилесини сайламады.

⁶⁸ Лякин Ехуданынъ къабилесини сайлады, Озю севген Сион дагъыны сечип алды.

⁶⁹ Озюнинъ мукъаддес мескенини коклер киби яратты, ер юзю киби эбедиен ерлештирди,

⁷⁰ Озь къулу Давутны сайлады ве оны къой къораларындан алып чыкъты.

⁷¹ Оны мал бакъкъанлардан алды, Озь халкъы олгъан Якъупны, Озь мирасы олгъан Исраильни бакъмагъа къойды.

⁷² Давут исе темиз юрекнен оларгъа чобан олды, беджерикли къолларынен оларгъа ёл косьтерди.