Зебур 76 - Мукъаддес Китап

Къайгъы вакътында теселли

¹ Баш чалгъыджы ичюн. Едутун ичюн. Асафнынъ зебуры.

² Аллагъа сесимни юксельтирим, Оны чагъырырым, Аллагъа сесимни юксельтирим, О, манъа къулакъ асар.

³ Беля кунюмде Раббини къыдырдым, гедже къолумны котерип, ич тюшюрмейджегим, джаным исе теселлини ред эте.

⁴ Алланы хатырлап, инъильдедим, тюшюнджеге далып, джаным зайыфлашты. Сэла

⁵ Сен козь юммагъа ёл бермединъ, джаным раатсыз эди, лафларым кесильди.

⁶ Мен эски куньлерни, кечкен девирлерни тюшюндим.

⁷ Геджелери йырларымны хатырлап, юрегимнен субетлештим, рухум исе менден сорады:

⁸ «Рабби бизни эбедиен ташладымы, разылыгъыны энди бермейджекми?

⁹ Онынъ севгиси бутюнлей ёкъ олдымы, келеджек несиллерге Сёзю кечмейджекми?

¹⁰ Алла мерамет эйлемекни унуткъанмы, шефкъатыны гъазап къапладымы?» Сэла

¹¹ «Алланынъ къудрети денъишкени – бу меним дердим», – дедим.

¹² Мен РАББИнинъ ишлерини хатырлайджагъым, Сенинъ къадимий аджайип ишлеринъни эсиме кетиреджегим.

¹³ Сенинъ бутюн ишлеринъ акъкъында фикир юрсетип, косьтерген аджайип ишлеринъни тюшюнеджегим.

¹⁴ Эй, Алла, Сенинъ ёлунъ мукъаддестир, Алламыз киби улу ким бар экен?

¹⁵ Аджайип ишлер япкъан Алла тек Сенсинъ, халкълар арасында къудретинъни бильдирдинъ!

¹⁶ Озь халкъынъны кучьлю къолунънен сатын алдынъ, Якъуп ве Юсуфнынъ огъулларыны къуртардынъ. Сэла

¹⁷ Сувлар Сени корьди, эй, Алла, сувлар Сени корьди де, сарсылды, тюпсюз чукъурлар да титреди.

¹⁸ Булутлар ягъмур ягъдырды, къара булутлар гудюрдеди, ве окъларынъ анда-мында учты.

¹⁹ Къасыргъа ичинден Сенинъ коклеринъ гудюрдеди, яшынларынъ дюньяны ярыкълатты, ве ер юзю къалтырап титреди.

²⁰ Сенинъ ёлларынъ денъизден кечти, сокъакъларынъ – буюк сувлардан. Излеринъ исе белли дегиль.

²¹ Сен халкъынъны Муса ве Харуннынъ къолунен къойларны киби етеклеп бардынъ.