Зебур 75 - Мукъаддес Китап

Алла енъер!

¹ Баш чалгъыджы ичюн. Телли чалгъы алетлеринде. Асафнынъ зебуры. Йыр.

² Ехудада Алла беллидир, Исраильде Онынъ Ады улу.

³ Онынъ мескени – Салимде, яшагъан ери – Сионда эди.

⁴ Шу ерде О, яйнынъ окъларыны сындырды, къалкъаннен къылычны ве дженк силяларыны. Сэла

⁵ Сен нурлусынъ, джанаварларнен толу дагълардан да салтанатлысынъ.

⁶ Къавий юреклилер ав эти олды, олюм юкъусына далды. Бутюн акъайлардан ич бирисининъ къолунда кучь тапалмады.

⁷ Эй, Якъупнынъ Алласы, Сенинъ азарламанъдан, эм араба, эм ат сонъки юкъусына далды.

⁸ Сен къоркъунчлысынъ, гъазабынъ кельгенде, къаршынъда ким тура билир?

⁹ Коклерден къарарынъны бильдирдинъ, ер къоркъып, сесини кести.

¹⁰ Эй, Алла, Сен суд этмеге турдынъ, ердеки бутюн заваллыларгъа къуртарувны кетирдинъ. Сэла

¹¹ Инсанларнынъ гъазабы биле Санъа шурет догъура, къалгъан гъазапны исе Сен ятыштырасынъ.

¹² РАББИ олгъан Алланъызгъа адакълар беринъиз, сонъ оларны беджеринъиз! Эй, Онынъ этрафында олгъанларнынъ эписи, Къоркъунчлы Аллагъа бахшыш кетиринъиз!

¹³ О, башлыкъларнынъ рухуны югенлей, О, дюнья падишалары ичюн къоркъунчлыдыр!