Зебур 73 - Мукъаддес Китап

Халкъны къуртараджакъ дува

Асафнынъ маскили.

¹ Эй, Алла, Сен не ичюн бизни эбедий ред эттинъ? Не ичюн гъазабынъ Озь отлагъынънынъ къойларына атеш олды?

² Къадимий замандан Сен сатын алгъан топлашувынъны акълынъда тут; къысметинъ олгъан бу миллет ичюн Сен одеме бердинъ. Булунгъан еринъ олгъан Сион дагъыны унутма!

³ Асырларнен тургъан йыкътырмагъа бакъып, адым ат: душман Азиз Ерде эр шейни харап этти.

⁴ Корюшюв ерининъ ортасында душманларынъ авулдай, бельги олсун деп, озь бельгилерини къойгъанлар.

⁵ Олар санки сыкъ орманда балта котергени киби арекет эттилер.

⁶ Олар бутюн агъач оймаларыны балталарнен ве буюк чёкючлернен ёкъ эттилер.

⁷ Азиз Еринъни бус-бутюн якътылар, Адынъ булунгъан Мескенни арамладылар.

⁸ Юреклеринде: «Оларнынъ эписини бойсундыраджакъмыз!» – дедилер; ер юзюнде Аллагъа ибадет эткен бутюн ерлерни кульге чевирдилер.

⁹ Бельгилеримизни энди корьмеймиз, пейгъамбер де къалмады бизде, не вакъыткъадже девам этеджегини ич кимсе бильмей.

¹⁰ Эй, Алла, не вакъыткъадже душман Сени мыскъыллайджакъ? Душман Адынъны эбедиен яманлайджакъмы?

¹¹ Не ичюн къолунъны, кучьлю онъ къолунъны узатмайсынъ? Къойнунъдан къолунъны чыкъар да, ёкъ эт оларны.

¹² Эй, Алла, Сен къадимий замандан берли меним Падишамсынъ, ернинъ ортасында къуртарув бересинъ!

¹³ Сен къудретинънен денъизни ярдынъ, аждерханынъ башларыны сувда парчаладынъ.

¹⁴ Ливьятаннынъ башларыны эздинъ, оны сахранынъ сакинлерине аш эттинъ.

¹⁵ Сен янъы чокъракъ ве озенни ерни ярып яраттынъ, буюк дерьяларны къуруттынъ.

¹⁶ Куньдюз Сенинъ, гедже де Сенинъ. Ай ве йылдызларны, кунешни де Сен ерлештирдинъ.

¹⁷ Ер юзюнинъ бутюн сынъырларыны Сен къойдынъ, яз ве къышны яраткъан Сенсинъ.

¹⁸ Шуны унутма, я РАББИ: душман Сени яманлады, акъылсыз адамлар Адынъны сёгди.

¹⁹ Гогерджининънинъ джаныны кийик айванларгъа берме, заваллыларнынъ аятыны эбедиен унутма!

²⁰ Сен берген васиетинъни козь огюне ал, чюнки ернинъ къаранлыкъ кошелери зулум эвлеринен толып кетти.

²¹ Азап чеккенлер масхара олып къайтмасынлар, заваллы ве фукъарелер кене Адынъны макътасынлар!

²² Тур, эй, Алла, Озь давалы ишинъни къорчала! Кунь бою акъылсызлар Сени яманлагъаныны хатырла!

²³ Душманларынъ къычыргъаныны унутма! Санъа къаршы чыкъкъанларнынъ шаматасы токътамайып юкселе де!