Зебур 71 - Мукъаддес Китап

Падиша акъкъында дува

Сулейманнынъ зебуры .

¹ Эй, Алла, падишагъа – Озь укюминъни, падишанынъ огълуна – адалетинъни багъышла!

² О, Сенинъ халкъынъны догърулыкънен, фукъарелеринъни адалетнен суд этсин.

³ Дагълар адамларгъа аманлыкъны кетирсин, тёпеликлер исе – адалетни.

⁴ О, халкънынъ фукъарелерине суд этсин, гъарипнинъ огъулларыны къорчаласын, залымны исе эзип ташласын!

⁵ Кунеш ве ай олгъан вакъытта, бутюн несиллер Сенден къоркъаджакъ.

⁶ Отлары чалынгъан чайыргъа тюшкен ягъмур киби, топракъны суваргъан тамчылар киби, О, дюньягъа тюшсюн.

⁷ Онынъ куньлеринде инсафлы онъаджакъ, ай ёкъ олгъандже, аманлыкъ чокълашаджакъ.

⁸ Денъизден денъизге къадар, буюк дерьядан ернинъ четлеринедже О, укюм этеджек.

⁹ Сахранынъ халкъы Онынъ алдында тиз чёкеджек, душманлары топракъ ялайджакъ.

¹⁰ Таршишнинъ ве адаларнынъ падишалары Онъа бахшышлар кетиреджек, Шева ве Сева падишалары Онъа берги береджек.

¹¹ Бутюн падишалар Онъа бель букеджек, бутюн халкълар Онъа хызмет этеджек.

¹² О, ярдым истеген факъырны, ярдымджысы олмагъан фукъарени къуртараджакъ.

¹³ Гъарип ве факъырны аджыйджакъ, заваллыларнынъ джанларыны къуртараджакъ.

¹⁴ О, баскъынджыдан ве залымдан оларнынъ джанларыны азат этеджек, Онынъ козю огюнде оларнынъ къаны пек паалы оладжакъ.

¹⁵ О, чокъ яшайджакъ, Онъа Шева алтыныны береджеклер, токътамайып Онынъ ичюн дува окъуйджакълар, эр кунь Онъа шукюр этеджеклер.

¹⁶ Дюньяда чокъ ашлыкъ олсун, о, дагъларнынъ башында далгъалансын, мейва тереклери Ливан орманы киби олсун. Шеэр халкъы исе ердеки от киби чокълашсын.

¹⁷ Онынъ Ады эбедиен яшасын, кунеш тургъандже Ады турсун. Къабилелер О аркъалы яхшылыкъ кореджеклер, бутюн халкълар Онъа «бахтлы» дейджеклер.

¹⁸ РАББИ-Таалягъа, Исраильнинъ Алласына бинъ шукюр олсун! Аджайип ишлерини ялынъыз Озю япа!

¹⁹ Онынъ шуретли Адына эр вакъыт шукюрлер олсун, бутюн ер юзю Онынъ шуретинен толсун! Амин! Амин!

²⁰ Шунынънен, Йишай огълу Давутнынъ дувалары битти.