Зебур 70 - Мукъаддес Китап

Къартлыкъта къорчалагъан дува

¹ Я РАББИ, мен Санъа сыгъынам, эбедий масхара олмайым!

² Догърулыгъынъ хатири ичюн мени къорчала ве сакъла мени, къулагъынъны меним тарафыма чевир ве къуртар мени!

³ Сен мен ичюн сакълангъан къая ол, эр вакъыт къачып, сакълангъан ерим олсун! Сен мени къуртармагъа буюрдынъ; къаям ве къалем Сенсинъ!

⁴ Эй, Аллам, мени ярамай адамдан, къанун бозгъан адамдан ве залымнынъ панджасындан къуртар!

⁵ Меним умютим Сенсинъ, я РАББИ-ТААЛЯ, яшлыгъымдан берли Санъа ишандым!

⁶ Догъулгъанымдан мен Санъа таяндым, анамнынъ къурсагъындан Озюнъ мени чыкъардынъ, Сени макътамагъа токътамам.

⁷ Мен чокъларнынъ козюнде аджайип бир шей эдим, амма Сен – меним къудретли сыгъынагъым.

⁸ Агъзым Сени эр вакъыт макътасын, Сенинъ гузеллигинъни эр кунь бильдирсин.

⁹ Къартайгъанымда, мени ташлап кетме, къуветим биткенде, мени къалдырма!

¹⁰ Душманларым манъа къаршы яман сёзлер айталар, джанымны алмагъа истегенлер озьара анълашалар.

¹¹ Олар: «Алла оны ташлап кеткен. Оны къувалап етинъиз де, тутунъыз оны; оны къуртараджакъ кимсеси ёкъ да», – дейлер.

¹² Эй, Алла, менден узакълашма, манъа ярдым этмеге ашыкъ, эй, Аллам!

¹³ Джанымнынъ душманлары масхара олып, ёкъ олсун! Манъа яманлыкъ истегенлерни утанч ве акъарет къапласын!

¹⁴ Мен исе эр вакъыт Санъа умют багълайджагъым, Санъа макътавларны чокълаштыраджагъым.

¹⁵ Агъзым Сенинъ догърулыгъынъны ве къуртарувынъны эр кунь айтып береджек; аджайип ишлеринънинъ сайысыны бильмейим де.

¹⁶ Мен РАББИ-ТААЛЯнынъ къудрети акъкъында тюшюнеджегим, Сенинъ догърулыгъынъны хатырлайджагъым, ялынъыз Сенинъ догърулыгъынъны.

¹⁷ Яшлыгъымдан Сен мени огреттинъ, эй, Алла, бугуньге къадар аджайип шейлеринъни айтып берем.

¹⁸ Эй, Алла, мен къартайгъанымда да, сачым агъаргъанда да, мени къалдырма, шу несильге Сенинъ къудретинъни бильдирмегенимдже, келеджек эвлятларыма батырлыгъынъны айтып бермегенимдже!

¹⁹ Эй, Алла, акъикъатынъ кок киби юксектир, Сен улу ишлер беджердинъ. Эй, Алла, Сен киби ким бар?

²⁰ Сен мени чокъ яман беляларгъа огъраттынъ, амма янъыдан мени джанландырдынъ, ернинъ буюк теренлигинден къайтарып, мени чыкъардынъ!

²¹ Мени юксельтип, меним гонълюмни алдынъ!

²² Эй, Аллам, арфада чалып, Сени ве Сенинъ акъикъатынъны макътайджагъым; Санъа сантырда чаладжагъым, эй, Исраильнинъ Азизи!

²³ Мен Санъа йырлагъанымда, дудакъларым къувана, Сен къуртаргъан джаным да къувана.

²⁴ Меним тилим эр кунь акъикъатынъны бильдиреджек, чюнки манъа яманлыкъ истегенлер утанып, масхара олдылар!