Зебур 68 - Мукъаддес Китап

Къасеветте ярдым сорав агълавы

1 Баш чалгъыджы ичюн. Шошаним авасында. Давутнынъ зебуры .

¹ Баш чалгъыджы ичюн. Шошаним авасында. Давутнынъ зебуры.

² Къуртар мени, эй, Алла, сувлар джаныма къадар етти.

³ Терен батакъкъа баттым, аякъ басмагъа ерим ёкъ; терен сувлар ичине кирдим, оларнынъ акъынтысы мени алып кете.

⁴ Мен фигъан котерип, болдурдым, тамагъым къуруп къалды. Алланы беклей-беклей, козьлерим зайыфлашты.

⁵ Себепсиз мени кореджек козьлери олмагъанлар башымдаки сачлардан да чокъ олды. Манасыз манъа къаршы чыкъкъанлар, меним душманларым кучьке кирди. Мен ич бир шей алмагъан олсам да, къайтарып бермеге меджбур этелер.

⁶ Эй, Алла, акъылсызлыгъымны Озюнъ билесинъ, къабаатларымны да Сенден гизлемейим.

⁷ Ордуларнынъ РАББИ-ТААЛЯсы, меним ичюн Санъа умют эткенлер утанмасын! Эй, Исраильнинъ Алласы, меним ичюн Сени къыдыргъанлар масхара олмасын!

⁸ Сенинъ ичюн мен акъаретке къатландым, утангъанымдан юзюмни къапаттым.

⁹ Агъа-къардашларыма ят адам олдым, озь анамнынъ огъулларына ябанджы олып къалдым.

¹⁰ Сенинъ Эвинъе олгъан шевкъим ичимде яна. Сени яманлагъанларнынъ сёзлери меним башыма тюшти.

¹¹ Агълап, аштан вазгечип, джанымны къыйнадым, бу да манъа къабаат олды.

¹² Чувалдан озюме урба япкъанымда, олар ичюн мен къара шакъа олдым.

¹³ Шеэрнинъ араба къапусы янында отургъанларнынъ агъзына тюштим, шарап ичкенлер де меним акъкъымда йырлай.

¹⁴ Я РАББИ, дувам Санъа разылыкъ вакътында етсин. Эй, Алла, Сенинъ буюк севгинъде манъа джевап бер, манъа акъикъий къуртарувынъны косьтер.

¹⁵ Мени балчыкътан чыкъар, батып кетмейим! Мени кореджек козю олмагъан адамлардан, терен сувлардан къуртулайым!

¹⁶ Акъкъан сувлар мени алып кетмесин, теренлик мени ютмасын, олюм чукъурынынъ агъзы устюмден япылмасын!

¹⁷ Манъа джевап бер, я РАББИ! Сенинъ севгинъ эйидир, шефкъатынъ буюклигинде манъа айлан.

¹⁸ Озь юзюнъни къулунъдан гизлеме! Юрегим яна. Манъа тез джевап бер!

¹⁹ Якъынджа келип, джанымны сатын ал, къуртар мени душманларымдан!

²⁰ Озюнь билесинъ, башыма не къадар акъарет тюшти, не къадар утандым, масхара олдым. Душманларымнынъ эписи Сенинъ огюнъде.

²¹ Акъареттен юрегимни къан басты, мен хасталандым, аджыгъанларыны бекледим, олмады, теселли къыдырдым, лякин тапмадым.

²² Ашамакъ ичюн манъа оть бердилер, сувсагъанымда манъа сирке ичирдилер.

²³ Софралары оларгъа тузакъ олсун, аманлыкъ зияфетлери къапкъан олсун!

²⁴ Оларнынъ козь нурлары сёнип къалсын, беллери эр даим зайыф олсун!

²⁵ Сен гъазабынъны оларнынъ башына сач, ачувынънынъ атеши оларгъа япышсын!

²⁶ Оларнынъ яшагъан ерлери бош къалсын, чадырларында тири джан къалмасын!

²⁷ Сенден джеза алгъан адамны олар къува, Сен яралагъан адамнынъ азапларыны даа зияде япалар.

²⁸ Оларнынъ гунасына гуна къош, Сен оларны акълама!

²⁹ Тирилер китабындан адлары силинсин, инсафлыларнен берабер олмасынлар!

³⁰ Мен исе фукъаре ве азап чекем, эй, Алла, Сенинъ къуртарувынъ мени аякъкъа тургъузсын!

³¹ Йырымда Алланынъ Адыны макътайджагъым, шукюрлер айтып, Оны юксельтеджегим!

³² Мына бу шей РАББИге эр бир туякълы, бойнузлы бугъадан, я да танадан чокъ кейф кетирир.

³³ Тынч адамлар буны корип къуванаджакълар. Эй, Алланы къыдыргъанлар, сизинъ юреклеринъизге кене джан кирсин!

³⁴ РАББИ фукъарелерни эшите, эсирликке тюшкенлерден О, игренмей.

³⁵ Коклер, ер юзю ве денъизлер, олардаки бутюн джанлылар Алланы макътасынлар!

³⁶ Алла Сионгъа къуртулыш берер, Ехуданынъ шеэрлерини янъыдан къураджакъ. Халкъ анда ерлешип, топракънынъ саиби оладжакъ.

³⁷ Алланынъ къулларынынъ эвлятлары топракъта ерлешеджеклер, Алланынъ Адыны севгенлер анда яшайджакълар!