Зебур 67 - Мукъаддес Китап

Енъиш йыры

¹ Баш чалгъыджы ичюн. Давутнынъ зебуры. Йыр.

² Алла котерильсин, душманлары дагъылсын, Оны кореджек козю олмагъанлар Онынъ алдындан къачып кетсин!

³ Сен оларны, тютюн киби, даркъатып ташла! Атеште мум насыл ирип кетсе, ярамайлар Алланынъ алдындан шойле ёкъ олсун!

⁴ Инсафлылар исе къувансын, Алланынъ огюнде севинсинлер, къуванч иле шенъленсинлер олар!

⁵ Аллагъа тюркюлер йырланъыз, Онынъ Адына чалгъы чалынъыз! Булутларнынъ устюнде Юргенни юксельтинъиз! Онынъ Ады – РАББИ, къуванынъыз Онынъ алдында!

⁶ Алла Озюнинъ азиз ериндедир! О, оксюзлернинъ Бабасыдыр, тул къадынларнынъ Къорчалайыджысыдыр.

⁷ Алла бир озьлери къалгъанларгъа къоранта бере, зынджырларда олгъанларны азатлыкъкъа чыкъара, исьянджылар исе къуру сахрада къалалар.

⁸ Эй, Алла, Сен Озь халкъынънынъ алдына чыкътынъ, сахрада адым аттынъ. Сэла

⁹ Алланынъ алдында ер юзю тепренди, коклер дагъылып кетти. Алланынъ алдында, Исраильнинъ Алласы алдында Синай дагъы да тепренди.

¹⁰ Сен Озь мирасынъа кучьлю ягъмур ягъдырдынъ, эй, Алла. Олар такъаттан кесильгенде, Сен оларны джанландырдынъ.

¹¹ Сенинъ халкъынъ о ерде ерлешти, Сен фукъарелерге Озь яхшылыгъынъны азырладынъ, эй, Алла!

¹² Рабби эмирини айтып бере, пек чокъ къызлар хабер кетире:

¹³ «Ордуларнынъ падишалары къача, къача, эвде къалгъан къадынлар исе хазинени болелер».

¹⁴ Озь топракъларынъызда ерлешип, сиз гузель бир гогерджинге ошап къалдынъыз: онынъ къанатлары кумюшнен, онынъ тюклери исе темиз алтыннен къапланды.

¹⁵ Къудретли Олгъан бу дюньянынъ падишаларыны дагъыткъанда, санки къар Цалмон дагъыны басты.

¹⁶ Башан дагъы – Алланынъ дагъы, Башан дагъы – юксек дагъ.

¹⁷ Эй, юксек дагълар, не ичюн Алланынъ булунмакъ ичюн сайлап алгъан дагъына пахыллыкънен бакъасынъыз? Эльбетте, РАББИ анда эбедий отураджакъ!

¹⁸ Алланынъ дженк арабалары бинълернен, олар сайысыз; оларнынъ арасында Раббининъ Озю, О, Озь азиз еринде, Синай дагъындадыр.

¹⁹ Сен юксекликке котерильдинъ, эсирлерни эсирге алдынъ, инсанларнынъ ве исьянджыларнынъ бахшышларыны къабул эттинъ. РАББИ-Тааля анда яшасын!

²⁰ Эр кунь РАББИге бинъ шукюрлер олсун! Алла бизим юклеримизни эр кунь алып юре; О, бизим Къуртарыджымыз! Сэла

²¹ Алла – бизни къуртаргъан Алладыр! Олюмден къуртарув – РАББИ-ТААЛЯнынъ къолундадыр.

²² Алла Озь душманларынынъ башыны мытлакъа эзип ташлар, гуна ичинде яшагъаннынъ сачлы къафасыны эзер.

²³ «Мен сени Башандан къайтараджагъым, – деди Рабби, – денъиз тюбюнден къайтараджагъым сени.

²⁴ Аякъларынънен душманларынынъ къаныны таптайджакъсынъ, сенинъ копеклеринъ душман джесетлерини ашайджакъ!»

²⁵ Алла, олар Сенинъ юргенинъни корьди. Олар Алламнынъ, меним Падишамнынъ юргенини корьдилер. О, азизликнен орьтюльген!

²⁶ Башта йыр йырлагъанлар, аркъада чалгъыджылар, ортада даре чалгъан яш къызлар келе.

²⁷ Эй, сизлер, Исраиль союндан олгъанлар, топлашувларда РАББИ-Таалягъа шукюрлер олсун!

²⁸ Мына, кендже Биньямин – оларнынъ ёлбашчысы, Ехуданынъ башлыкълары пек чокъ, Зевулун башлыкълары ве Нафталий башлыкълары да анда.

²⁹ Алла санъа: «Къудретли оладжакъсынъ», – деди. Бизге япкъанынъны тасдыкъла, я РАББИ!

³⁰ Ерусалимдеки Сарайынъ ичюн падишалар Санъа бахшышлар кетиреджек.

³¹ Къамышлар ичинде яшагъан джанаварны, халкъларнынъ бузавлары арасындаки бугъаларнынъ сюрюсини тынчландыр. Олар кумюш кесеклери кетирип, Санъа бойсунсынлар. Дженк этмеге истеген халкъларны Озюнъ дагъытып ташла!

³² Мысырдан эльчилер келеджек, Хуш Аллагъа къол узатаджакъ.

³³ Эй, ер юзю падишалыкълары, Аллагъа йыр йырланъыз, Раббиге чалгъы чалынъыз! Сэла

³⁴ Коклерде, къадимий коклерде О, юре, О, Озь сесине кучь бере.

³⁵ Алланынъ къудретини шуретленъиз! Онынъ улулыгъы Исраильнинъ устюнде, къудрети исе булутларда!

³⁶ Алла Озь азиз еринде къоркъунчлыдыр, О, Исраильнинъ Алласы, Озь халкъына кучь ве къавийлик бере! Аллагъа бинъ шукюрлер олсун!