Зебур 66 - Мукъаддес Китап

Бутюн халкълар ичюн дува

¹ Баш чалгъыджы ичюн. Телли чалгъы алетлеринде. Зебур. Йыр.

² Эй, Алла, бизге мерамет эт, эм де разылыкъ бер! Сенинъ юзюнъ бизни ярыкълатсын! Сэла

³ Ер юзюнде яшагъанлар Сенинъ ёлунъны бильсинлер, къуртарувынъ акъкъында бутюн халкъларнынъ хабери олсун!

⁴ Эй, Алла, халкълар Сени макътасын, бутюн халкълар Сени макътасынлар!

⁵ Миллетлер севинсин, къуванчнен къычырсын! Сен халкъларны догърулыкънен суд этесинъ, ер юзюндеки миллетлерге ёл косьтересинъ. Сэла

⁶ Эй, Алла, халкълар Сени макътасын, халкълар Сени макътасынлар! Сэла

⁷ Мына, топракъ озь берекетини берди. Алла-Алламыз бизнен разы олсун!

⁸ Алла бизнен разы олсун, ер юзюнинъ бутюн четлери Ондан къоркъсун!