Зебур 65 - Мукъаддес Китап

Макътав ве тешеккюр йыры

Баш чалгъыджы ичюн. Йыр. Зебур.

¹ Эй, бутюн ер юзю, Аллагъа къуванчнен къычырынъыз!

² Онынъ улу Адыны шуретлеп, тюркю йырланъыз, шан-шуретини юксельтинъиз, макътанъыз Оны!

³ Аллагъа айтынъыз: Сенинъ ишлеринъ не къадар къоркъунчлы! Буюк къудретинъ ичюн душманларынъ Санъа боюн эгеджек.

⁴ Бутюн дюнья Санъа бель букеджек, Санъа йыр йырлайджакъ, Адынъа чалгъы чаладжакъ! Сэла

⁵ Келинъиз де, Алланынъ аджайип ишлерини корюнъиз! О, инсан огъулларына не де къоркъунчлы ишлерни косьтерди!

⁶ О, денъизни къуру топракъкъа айландырды; олар озенден джаяв кечти. О ерде биз Онъа къувандыкъ!

⁷ О, Озь къудретинен эр вакъыт падишалыкъ этеджек. Онынъ козьлери халкъларгъа дикъкъатнен бакъалар. Исьянджылар Онъа къаршы котерильмезлер! Сэла

⁸ Эй, халкълар, Алламызгъа шукюр этинъиз, Оны макътагъан сеслерни эшиттиринъиз!

⁹ О, Озю бизим джанымызны сакълады, аягъымызнынъ таймасына ёл бермеди.

¹⁰ Сен бизни сынап бакътынъ, эй, Алла, кумюшни атешнен темизлегенлери киби, Сен де бизни темизлединъ.

¹¹ Сен бизни къапкъанларгъа тутып, аркъамызгъа агъыр юк къойдынъ.

¹² Сен башкъа адамларны башымыз устюнде къойдынъ; биз атештен ве сувдан кечтик; Сен исе бизни аманлыкъ ерге чыкъардынъ.

¹³ Мен Сенинъ Эвинъе бараджагъым, бутюнлей якъыладжакъ къурбанларны кетиреджегим, Санъа берген адакъларымны беджереджегим.

¹⁴ Беля куньлеримде озь агъзымнен, озь дудакъларымнен бу адакъларымны бердим.

¹⁵ Санъа семиз айванларны къурбан чалып, багъышларым, къочкъарнынъ ич ягъыны куйдюрип, тютетирим, бугъаларнен текелерни Санъа багъышларым. Сэла

¹⁶ Эй, сиз, эпинъиз Алладан къоркъкъанлар! Келинъиз, динъленъиз, джаным ичюн О, нелер япкъаныны айтып береджегим.

¹⁷ Озь агъзымнен Оны чагъырдым, тилимнен мен Оны юксельттим.

¹⁸ Юрегимде яманлыкъ олгъан олса, Рабби мени динълемез эди.

¹⁹ Амма Алла мытлакъа мени эшитти, дувамнынъ сесине къулакъ асты.

²⁰ Алла дувамны ред этмеди, Озь севгисини менден узакълаштырмады. Онъа шукюрлер олсун!