Зебур 64 - Мукъаддес Китап

Коклернинъ ве ернинъ бахшышлары ичюн тешеккюр

¹ Баш чалгъыджы ичюн. Давутнынъ зебуры. Йыр.

² Эй, Алла, макътавлар Сени Сион дагъында беклей. Санъа берильген адакълар беджериледжек.

³ Сен дуваны эшитесинъ, бутюн инсанлар Санъа келеджек.

⁴ Гуналы ишлер мени енъелер, амма Сен къабаатларымызны багъышларсынъ.

⁵ Сен сайлагъан ве Озюнъе чеккен адам, Сенинъ азбарларынъда яшайджакъ адам не де бахтлыдыр! Биз Сенинъ Эвинънинъ, Мукъаддес Сарайынънынъ яхшылыгъындан тояджакъмыз.

⁶ Эй, Алла, бизим Къуртарыджымыз, догъру укюм чыкъаргъанда, Сен къоркъунчлысынъ, Сен бизге джевап бересинъ. Ернинъ бутюн четлеринде, узакъ денъизлерде олгъанлар биле Санъа ишаналар.

⁷ Озь кучюнънен дагъларны къойгъансынъ, батырлыкъны белинъе саргъансынъ.

⁸ Сен денъизлернинъ давушыны, далгъаларнынъ шувулдысыны, халкъларнынъ исьяныны токътатасынъ.

⁹ Ер юзюнинъ башкъа тарафында яшагъанлар Сенинъ япкъанларынъны корип къоркъаджакълар. Сен кунь догъгъан ве кунь баткъан ерлерни де Озь шуретинъе кетиреджексинъ.

¹⁰ Сен ерни зиярет этип, оны сувгъа тойдурасынъ ве оны зенгинлештиресинъ. Алланынъ дерьясы сувгъа толып таша. Сен ашлыкъ азырлайсынъ, чюнки ер юзюни ойле яраткъансынъ.

¹¹ Сабан ачкъан ёлакъларны сувгъа толдурып, топракъ кесеклерини Озюнъ парлайсынъ. Топракъны ягъмур тамчыларынен йымшатып, осюмликлерге берекет бересинъ.

¹² Йылны берекетнен яраштырасынъ, Сенинъ излеринъден ягъ акъа.

¹³ Чёльдеки отлакълар ешерелер, къырлар чечеклернен гузеллешелер.

¹⁴ Отлакъларгъа сюрюлер чыкъа, вадийлер богъдайгъа тола, олар къувангъанындан къычырып, йыр йырлайлар.