Зебур 62 - Мукъаддес Китап

Алланен булунмагъа истеги

1 Давутнынъ зебуры. Давут Ехуда сахрасында олгъан вакъытта язылгъан йыр .

¹ Давутнынъ зебуры. Давут Ехуда сахрасында олгъан вакъытта язылгъан йыр.

² Эй, Алла, Сен меним Алламсынъ, танъ аткъанынен Сени къыдырам. Джаным Сени истей; къуру, бош, сувсуз топракъларда беденим Сени беклеп къыйнала.

³ Мукъаддес булунгъан еринъде Сени корьгеним киби, къудретинъ ве шуретинъни корьмеге истейим.

⁴ Сенинъ севгинъ аяттан гузельдир, меним дудакъларым Сени макътайджакъ.

⁵ Омрюм боюнджа Санъа шукюр этеджегим, къолларымны Сенинъ Адынънен юкъарыгъа котереджегим.

⁶ Ич ягъы ве зейтюн ягъынен джаным тойгъаны киби, агъзым ве дудакъларым къуванчнен Сени макътай.

⁷ Яткъанымда Сени акъылдан чыкъармайым, геджелери Сени тюшюнем.

⁸ Къанатларынъ кольгесинде къуванаджагъым, чюнки Сен манъа ярдымджы олдынъ.

⁹ Джаным Санъа япышты, Сенинъ онъ къолунъ мени къатты тута.

¹⁰ Амма джанымны ёкъ этмеге истеген адамлар ернинъ теренлигине тюшип кетсинлер.

¹¹ Олар къылычтан олюм кореджеклер, кийик копеклерге аш оладжакълар.

¹² Падиша исе Аллагъа къуванаджакъ. Алланынъ Адынен ант эткен эр кес макътавгъа огърайджакъ, чюнки яланджыларнынъ агъызлары къапаладжакъ!