Зебур 6 - Мукъаддес Китап

Беля куньлеринде окъулгъан ярдым дувасы

¹ Баш чалгъыджы ичюн. Телли чалгъы алетлеринде. Аль-хашшеминит. Давутнынъ зебуры.

² Я РАББИ, ачувынъда тазирлеме мени, гъазабынъда мени джезалама!

³ Аджы мени, я РАББИ, меним кучь-къуветим ёкъ. Мени тедавийле, я РАББИ, кемиклерим къоркъудан титрей.

⁴ Джаным да къоркъудан пек титрей. Сен исе, я РАББИ, не вакъыткъадже бу шей девам этеджек?

⁵ Къайт манъа, я РАББИ, джанымны къуртар, буюк севгинъ ичюн къуртар мени!

⁶ Ольгенлер Сени анъмазлар, олюлер дюньясында ким Санъа шукюр этер?

⁷ Инълей-инълей мен ёрулдым. Эр гедже агълагъаным ичюн, тёшегим сым-сылакъ, козьяшларым тёшегимни сылата.

⁸ Козюмнинъ нуру къайгъыдан къуру, козьлерим бутюн душманларымдан зайыфлашты.

⁹ Эй, яманлыкъ япкъанларнынъ эписи, узакълашынъыз менден, чюнки РАББИ агълагъанымны эшитти.

¹⁰ РАББИ ялваргъанымны эшитти. РАББИ дувамны къабул этеджек.

¹¹ Бутюн душманларым масхара олып, эписини дешет къапласын! Кери къайтсынлар, апансыздан утансынлар!