Зебур 56 - Мукъаддес Китап

Ярдым дувасы

1 Баш чалгъыджы ичюн. Аль-ташхет. Давутнынъ миктамы. Шаулдан къачып Давут къобада сакълангъан вакъытта язылгъан йыр .

¹ Баш чалгъыджы ичюн. Аль-ташхет. Давутнынъ миктамы. Шаулдан къачып Давут къобада сакълангъан вакъытта язылгъан йыр.

² Мерамет эт манъа, эй, Алла, мерамет эт манъа! Джаным Санъа умют багълай; белялар кечмегенине къадар, къанатларынъ кольгесинде сакъланаджагъым.

³ Мен Юдже Алланы, мен ичюн эр шейни япкъан Алланы чагъыраджагъым.

⁴ О, коктен манъа къуртулыш ёллайджакъ, мени ёкъ этмеге истегенлерни масхара этеджек. Сэла Алла Озюнинъ севгисини ве акъикъатыны ёллайджакъ.

⁵ Джаным арсланлар арасында къалды; атеш къускъанларнынъ, инсан огъулларынынъ арасында ятам: оларнынъ тишлери – сюйрю мызракъ ве окъ киби, тиллери – кескин къылыч кибидир.

⁶ Эй, Алла, коклерден де юкъарыгъа чыкъ, шуретинъ бутюн ер юзюни къапласын!

⁷ Олар аякъларыма къапкъан азырлады, – джаным ашагъы тюшти, – ёлумда чукъур къаздылар, – озьлери онынъ ичине тюшти. Сэла

⁸ Юрегим азыр, эй, Алла, юрегим азыр. Мен Санъа йыр йырлайджагъым, Сени шуретлейджегим!

⁹ Уян, эй, шуретим! Уянынъыз, эй, арфа ве сантыр! Мен эрте тураджагъым.

¹⁰ Халкълар арасында Сени шуретлейджегим, я Рабби, къабилелер арасында Санъа йыр йырлайджагъым!

¹¹ Сенинъ буюк севгинъ коклерге ете, акъикъатынъ да булутларгъа етише!

¹² Эй, Алла, коклерден де юкъарыгъа чыкъ, шуретинъ бутюн ер юзюни къапласын!