Зебур 55 - Мукъаддес Китап

Аллагъа умют дувасы

1 Баш чалгъыджы ичюн. «Йонат элем рехоким» авасында. Давутнынъ миктамы. Фелестинлилер Давутны Гъат шеэринде туткъан вакъытта язылгъан йыр .

¹ Баш чалгъыджы ичюн. «Йонат элем рехоким» авасында. Давутнынъ миктамы. Фелестинлилер Давутны Гъат шеэринде туткъан вакъытта язылгъан йыр.

² Эй, Алла, манъа мерамет эт! Инсан мени ютмагъа истей. Кунь бою манъа атылып, о, мени сыкъыштыра.

³ Эр кунь душманларым мени ютмагъа истей, манъа къаршы дженк эткенлер пек чокъ, эй, Юксельген Алла!

⁴ Къоркъкъан кунюмде мен Санъа ишанам.

⁵ Мен Аллагъа, – Онынъ сёзюни макътайджагъым, – мен Аллагъа ишандым ве ич къоркъмам; инсан манъа не япа билир?

⁶ Эр кунь олар сёзлеримни бозалар, манъа къаршы бутюн ниетлери яман.

⁷ Олар топлашып, сакъланалар, гизлиден излериме бакъалар, джанымны алмагъа истейлер.

⁸ Аджеба олар озьлери адалетсиз япкъанлары ичюн джезадан къуртуладжакълармы? Эй, Алла, ачувынъны косьтерип, халкъларны ерге тюшюр!

⁹ Сен меним долашкъанымны эсапкъа алгъансынъ; козьяшларымны Озь мешин торбанъа къой; олар Сенинъ китабынъда язылгъан дегильми?

¹⁰ Мен Сени чагъыргъан кунюмде душманларым артына къайталар; бундан мен билем: Алла меним тарафымда.

¹¹ Мен Аллагъа, – Онынъ сёзюни макътайджагъым, – мен РАББИге, – Онынъ сёзюни макътайджагъым, –

¹² мен Аллагъа ишандым ве ич къоркъмам; инсан манъа не япа билир?

¹³ Эй, Алла, Санъа берген адакъларым бар; мен Санъа шукюрлер кетиреджегим.

¹⁴ Сен джанымны олюмден къуртардынъ, аякъларымны сюрюнмектен сакъладынъ. Мен энди омюр ярыгъында, Алланынъ козю огюнде юреджегим!