Зебур 53 - Мукъаддес Китап

Душманлардан къорчалагъан дува

¹ Баш чалгъыджы ичюн. Телли чалгъы алетлеринде. Давутнынъ маскили.

² Зифлилер Шаулнынъ алдына барып: «Давут бизим арамызда сакълана», – деген вакъытта Давут бу йырны язды.

³ Эй, Алла, Адынъ иле мени къуртар, къудретинъ иле мени догъру суд эт!

⁴ Эй, Алла, дувамны динъле, агъзымдан чыкъкъан сёзлериме къулакъ ас.

⁵ Ябанджы адамлар манъа къаршы чыкъты, мераметсиз адамлар джанымны алмагъа истей; оларнынъ алдында Алла ёкъ. Сэла

⁶ Мына, Алла манъа ярдымджыдыр, Рабби джаныма кучь бере.

⁷ О, меним душманларымны яманлыкълары ичюн мытлакъа джезалайджакъ. Ишанчлы олып, оларны ёкъ эт!

⁸ Санъа озь истегимнен къурбан чаладжагъым, Адынъны шуретлейджегим, я РАББИ, чюнки Сенинъ Адынъ эйидир!

⁹ Сен мени бутюн белялардан къуртардынъ, ве козьлерим енъильген душманларымны корьди.