Зебур 50 - Мукъаддес Китап

Багъышлав дувасы

¹ Баш чалгъыджы ичюн. Давутнынъ зебуры.

² Давут Бат-Шеванен яткъан сонъ, Натан пейгъамбер онынъ алдына кельген сонъ, Давут бу дуваны окъуды.

³ Эй, Алла, Сенинъ буюк севгинъ ичюн манъа мерамет эт! Сынъырсыз шефкъатынъ ичюн къанунсыз ишлеримни менден узакълаштыр!

⁴ Мени къабаатымдан бутюнлей ювып, мени гуналарымдан темизле!

⁵ Къанунсыз ишлер япкъанларымны мен анълайым, япкъан гунам эр вакъыт козюм огюнде.

⁶ Мен Санъа, тек Санъа къаршы гуна яптым, Сенинъ козюнъ огюнде яманлыкъ яптым. Сенинъ сёзюнъ эр вакъыт догъру, суд эткенде де Сен адалетлисинъ.

⁷ Мен къабаатлы олып догъдым, анам меннен юкке къалгъанда, мен гуналы эдим.

⁸ Сен юректеки акъикъатны корьмеге истейсинъ, эм де ичиме бильги къоясынъ.

⁹ Эзов отуны сувгъа батырып, устюме септир, темиз олайым, мени юв, къардан да беяз олайым!

¹⁰ Манъа къуванч ве шенъликни эшиттир, Сен сындыргъан кемиклериме кене къуванч кирсин!

¹¹ Гуналарымдан юзь чевир, бутюн къанунсыз ишлеримни менден узакълаштыр!

¹² Эй, Алла, ичимде темиз юрек ярат, ичиме янъы, догъру рух къой.

¹³ Мени Озюнъден терк этип ташлама, Озь Мукъаддес Рухунъны менден алма.

¹⁴ Къуртарувынънен кельген къуванчны манъа къайтарып бер. Сени динълемеге истекни рухума берип, мени къуветлештир.

¹⁵ Къанун бозгъанларгъа Сенинъ ёлларынъны огретеджегим, ве гунакярлар Санъа къайтып келеджеклер.

¹⁶ Къан тёккеним ичюн къабаатымны менден ал, эй, Аллам, Къуртарыджым, ве тилим Сенинъ догърулыгъынъ акъкъында къуванчнен къычырыр.

¹⁷ Я Рабби, дудакъларымны ач, ве тилим Сени макътайджакъ!

¹⁸ Сен къурбан истемейсинъ, – мен оны кетирир эдим. Бутюнлей якъылгъан къурбандан да Сен разы олмайсынъ.

¹⁹ Алла къабул эткен къурбан – тынч юректир. Юваш ве пешман эткен юрекни Сен ред этмезсинъ, эй, Алла.

²⁰ Озь разылыгъынъа коре Сионгъа яхшылыкъ эт, Ерусалимнинъ диварларыны котер!

²¹ О вакъыт темиз къурбанларны, атеште якъылгъан, бутюнлей якъылгъан къурбанларны Сен къабул этеджексинъ. О вакъыт Сенинъ къурбан еринъе таналарны кетирип къояджакълар.