Зебур 5 - Мукъаддес Китап

Къорчалав дувасы

¹ Баш чалгъыджы ичюн. Аль-ханнехилот. Давутнынъ зебуры.

² Сёзлеримни эшит, я РАББИ, тюшюнджелеримни анъла.

³ Фигъан къопаргъан сесимни динъле, эй, Падишам ве Аллам, мен Санъа дува этем.

⁴ Саба сесимни эшит, я РАББИ. Сабадан Сенинъ алдынъа дувамны кетирип, джевапны умютнен беклерим.

⁵ Сен яманлыкъны севген Алла дегильсинъ, яман адам Сенинъ янынъда ер тапмаз.

⁶ Макътангъан адамлар Сенинъ къаршынъда турмаз. Къанун бозгъанларнынъ эписини кореджек козюнъ ёкъ.

⁷ Ялан айткъанларны Сен ёкъ этерсинъ. РАББИ къанназ ве яланджы адамларгъа игренчнен бакъар.

⁸ Мен исе, Сенинъ буюк севгинъ ичюн, Сенинъ Эвинъе киреджегим, Сенден къоркъып, Мукъаддес Сарайынъа тараф бель букеджегим.

⁹ Душманларым мени козеткенлери ичюн, мени Сенинъ адалет ёлунъа къой. Сенинъ ёлунъ огюмде догъру олсун, я РАББИ!

¹⁰ Оларнынъ агъзында догърулыкъ ёкътыр, ичлеринде исе олюм. Богъазлары – ачыкъ мезар, озь тиллеринен алдаталар.

¹¹ Эй, Алла, оларны джезагъа укюм эт! Оларнынъ яман ниетлери озьлерини урсун! Гуналары чокъ олгъаны ичюн, олар Санъа къаршы чыкъкъанлары ичюн, оларны тышарыгъа къув.

¹² Сонъ Санъа ишангъанлар эписи къувансынлар, даима севинчнен къычырсынлар! Оларны Озюнъ къорчалайджакъсынъ, Адынъны севгенлер Сен ичюн шенъленеджеклер!

¹³ Сен, я РАББИ, инсафлыларгъа яхшылыкъ япасынъ. Сенинъ разылыгъынъ оларнынъ чевре-четлерини, къалкъан киби, къорчалай.