Зебур 49 - Мукъаддес Китап

Алланы унуткъан адамларгъа насиат

Асафнынъ зебуры.

¹ Аллаларнынъ Алласы, РАББИ буюрды, кунешнинъ догъгъан еринден баткъан еринедже О, ер юзюни чагъырды.

² Алла гузельден-гузель Сиондан парылдады.

³ Алламыз келе, индемей турмаз. Онынъ огюнде – эр шейни якъаджакъ атеш, этрафында исе – кучьлю боран.

⁴ Озь халкъына суд этмек ичюн, О, ер юзюни ве юкъарыдан коклерни чагъыра:

⁵ «Мен азизлериме Озь васиетимни къурбан вастасынен бердим. Энди оларны Манъа топланъыз», – дей.

⁶ Коклер Онынъ акъикъатыны бильдиреджеклер, Алланынъ Озю – Укюм Чыкъарыджыдыр. Сэла

⁷ «Эй, халкъым, динъле, Мен айтаджагъым! Эй, Исраиль, санъа къаршы шаатлыкъ береджегим. Мен – Аллам, Сенинъ Алланъ.

⁸ Бахшышларынъ ичюн сени тазирлемейджегим, бутюнлей якъылгъан къурбанларынъ эр вакъыт къаршымда.

⁹ Мен не эвинъдеки тананы, не къошларынъдаки эчкилерни истейим.

¹⁰ Орманларнынъ бутюн айванлары Менимки, бинъ къыр устюнде яшагъан джанаварлар да Менимки.

¹¹ Бутюн дагъ къушларыны Мен билем, кийик айванлар да Меним алдымда.

¹² Ач олсам да, санъа айтмаз эдим, чюнки Менимкидир дюнья ве оны толдургъан барлыкъ.

¹³ Мен бугъа этини ашайыммы, текелернинъ къаныны ичемми?

¹⁴ Аллагъа къурбан ерине шукюр кетир, Юдже Аллагъа берген адакъларынъны беджер.

¹⁵ Беля куньлеринде Мени чагъыр, Мен сени къуртарырым, ве сен Мени шуретлерсинъ».

¹⁶ Гунакяргъа исе Алла шойле дей: «Не ичюн сен Меним низамнамелеримни айтып бересинъ? Меним васиетимни агъзынъа не ичюн аласынъ?

¹⁷ Озюнъ исе огютимден нефретленип, Меним сёзлеримни артынъа ташлайсынъ.

¹⁸ Хырсызны корьгенде, онен келишесинъ. Аиле садыкълыгъыны бозгъанларнен де дост оласынъ.

¹⁹ Агъзынъны яман сёзлер ичюн ачасынъ, тилинънен де фитнелер къурасынъ.

²⁰ Отурып, къардашынъа къаршы, озь ананънынъ огълуна ялан айтасынъ.

²¹ Сен бу ишлерни яптынъ, Мен исе индемедим; Мени де сен киби, деп тюшюндинъ. Энди Мен сени тазирлерим, гуналарынъны козюнъ огюне тизерим.

²² Буны анълап алынъыз, эй, сизлер, Алланы унуткъанлар! Ёкъса Мен сизлерни парчалап ташлайым, къуртарыджынъыз да олмаз.

²³ Ким къурбан ерине шукюр кетирсе, Мени урьмет эте. Ким озь ёлуна дикъкъат этсе, Мен онъа Алланынъ къуртарувыны косьтереджегим».