Зебур 47 - Мукъаддес Китап

Сион – Алланынъ шеэри

¹ Къорах огъулларынынъ зебуры. Йыр.

² РАББИ улудыр! Алламызнынъ шеэринде, Онынъ азиз дагъында Онъа чокъ макътавлар олсун!

³ Сион дагъы – гузель тёпеликтир, бутюн ер юзюнинъ къуванчыдыр! Онынъ шималь тарафында улу падишанынъ шеэри бар.

⁴ Алла онынъ сарайларында къорчалайыджы къале киби белли.

⁵ Шунынъ ичюн падишалар топланып, онынъ янына эписи якъынлашты.

⁶ Шеэрни корьгенде исе, шаштылар, пек къоркътылар да, къачтылар.

⁷ Догъаяткъан къадыннынъ агърысы киби, о ерде оларны къоркъу ве азап къаплады.

⁸ Сен, куньдогъуш елини кетирип, Таршиш гемилерини парчалап ташладынъ.

⁹ Биз эшиткен шейлерни Алламызнынъ шеэринде, Ордуларнынъ РАББИсининъ шеэринде корьдик. Алла шеэрни эбедиен къавийлештиреджек. Сэла

¹⁰ Эй, Алла, Сенинъ Сарайынънынъ ортасында биз буюк севгинъ акъкъында тюшюнджеге далдыкъ.

¹¹ Эй, Алла, Сенинъ Адынъ киби, шуретинъ де бутюн ер юзюнде даркъалгъан; Сенинъ онъ къолунъ адалетке толгъан!

¹² Сенинъ адалетли къарарларынъ ичюн, Сион дагъы севинсин, Ехуда къызлары къуванчнен къычырсын!

¹³ Сион этрафында кезип, оны айланып чыкъынъыз, къуллелерни сайынъыз.

¹⁴ Онынъ пекитильген ерлерине юрегинъизни чевиринъиз, къуветлештирильген сарайларына бакъынъыз, келеджек несильге шуны айтып беринъиз.

¹⁵ Мына бу Алла эбедиен бизим Алламыздыр, ольгенимиздже О, бизим Ёлбашчымыздыр!