Зебур 45 - Мукъаддес Китап

Алла бизнен!

¹ Баш чалгъыджы ичюн. Къорах огъуллары ичюн. Аль-аламот. Йыр.

² Биз Аллагъа сыгъынамыз, О, бизге къувет бере. Агъыр вакъытларымызда О, бизге тез-тез ярдым этип тура.

³ Шунынъ ичюн ер юзю тепренсе биле, дагълар денъизлернинъ багърына барып тюшсе де, биз къоркъмамыз.

⁴ Сувлар шувулдап, копюрильсе де, дагълар фуртунадан титресе де, биз къоркъмамыз! Сэла

⁵ Дерьянынъ сувлары Алланынъ шеэрине къуванч кетире, Юдже Алланынъ азиз яшагъан ерини севиндире.

⁶ Алла онынъ ортасында, о, тепренмез. Танъ аткъанынен Алла Озь шеэрине ярдым этер.

⁷ Халкълар шамата къопарды, падишалыкълар озь ерлеринден кочьти. Алла сес берди, ве дюнья ирип кетти.

⁸ Ордуларнынъ РАББИси бизнен, Якъупнынъ Алласы – бизим къалемиз! Сэла

⁹ Келинъиз, РАББИнинъ ишлерине бакъынъыз; О, ер юзюни бозып, оны бош къалдырды.

¹⁰ О, ернинъ четлерине къадар дженклерни токътата, яйны сындырып, мызракъны парчалай, дженк арабаларыны якъып, оларны кульге айландыра.

¹¹ «Токътанъыз да, билинъиз: Мен – Аллам. Халкълар арасында Мени юксельтеджеклер, ер юзюнде Мени юксельтеджеклер».

¹² Ордуларнынъ РАББИси бизнен, Якъупнынъ Алласы – бизим къалемиз! Сэла