Зебур 44 - Мукъаддес Китап

Падишанынъ келюви ве Онынъ келини акъкъында

¹ Баш чалгъыджы ичюн. Шошаним авасында. Къорах огъулларынынъ маскили. Севги йыры.

² Меним юрегимден гузель сёзлер тёкюле, меним йырымны падишагъа багъышлайым, тилим – уста бир языджынынъ къалемидир.

³ Сен инсан огъулларындан гузельсинъ, дудакъларынъдан мерамет тёкюле. Шунынъ ичюн Алла эбедиен сенден разы.

⁴ Эй, батыр, шуретинъ ве дюльберлигинънен берабер, къылычынъны белинъе такъ.

⁵ Бу улу урбанъда енъиш къазан, акъикъат, алчакъгонъюллик ве адалетни къорчаламакъ ичюн, дженк арабасына чыкъ. Сенинъ онъ къолунъ Санъа аджайип ишлер косьтерир.

⁶ Сенинъ окъларынъ пек сюйрю, олар падиша душманларынынъ юреклерине кирерлер. Халкълар Сенинъ аякъ астынъа йыкъылырлар.

⁷ Эй, Алла, Сенинъ тахтынъ эбедий, догърулыкънен падишалыкъ япасынъ.

⁸ Сен адалетни севесинъ, акъсыз ишлерни исе кореджек козюнъ ёкъ. Шунынъ ичюн Алла, Сенинъ Алланъ, Сенинъ башынъа къуванчнен ягъны тёкти, Сени аркъадашларынъдан устюн къойды.

⁹ Бутюн урбаларынъдан мюр, алоэ, тарчын къокъусы чыкъар; фильнинъ тишинден япылгъан сарайларда телли чалгъы алетлерининъ сеслери эшитиле, олар Сени къувандыралар.

¹⁰ Сайгъылы къадынларынъ арасында падишаларнынъ къызлары бар; къыраличе исе Офир алтынлары ичинде, Сенинъ онъ тарафынъда тура.

¹¹ Динъле, эй, къыз, къулакъ асып бакъ, халкъынъны ве баба эвинъни унут.

¹² Падиша сенинъ дюльберлигинъни арзу этмекте, О, сенинъ Эфендинъдир, Онъа белинъни бук.

¹³ Тир къызы Санъа бахшыш кетиреджек; халкънынъ энъ зенгин сойлары Сенинъ разылыгъынъны къыдыраджакълар.

¹⁴ Падишанынъ къызы – шурет ичинде, онынъ урбасы алтындан тикильген.

¹⁵ Нагъышлангъан урбада оны падишагъа чыкъараджакълар; онынъ артындан онынъ къыз достлары, оларны Санъа алып кирсетеджеклер.

¹⁶ Оларны севинч ве къуванчнен кирсетеджеклер, олар падишанынъ сарайына киреджеклер.

¹⁷ Бабаларынънынъ ерине огъулларынъ оладжакълар; Сен оларны бутюн дюньяда башлыкъ этип къояджакъсынъ.

¹⁸ Мен несильден несильге Сенинъ Адынъны белли япаджагъым, шунынъ ичюн халкълар Сени эбедиен макътайджакълар!