Зебур 43 - Мукъаддес Китап

Алланынъ халкъыны къорчалагъан дува

¹ Баш чалгъыджы ичюн. Къорах огъулларынынъ маскили.

² Эй, Алла! Биз озь къулакъларымызнен эшиттик, кечкен куньлерде, къадимий заманларда, Сен япкъан аджайип ишлеринъ акъкъында бабаларымыз бизге икяе этти.

³ Сен Озь къолунънен халкъларны къуваладынъ, баба-деделеримизни исе оларнынъ топрагъында ерлештирдинъ. Сен къабилелернинъ бойнуны урдынъ, оларны яшагъан ерлеринден къувдынъ.

⁴ Бабаларымыз бу ерни озь къылычынен алмадылар, къолларынынъ кучьлери оларны къуртармады, тек Сенинъ онъ къолунъ, Сенинъ кучюнъ, юзюнънинъ ярыгъы оларны къуртарды, чюнки Сен олардан разы эдинъ.

⁵ Эй, Алла, Сен – меним Падишам. Якъупкъа къуртулыш бер!

⁶ Сенинъ къуветинънен душманларымызны енъермиз, бизге къаршы чыкъкъанларны Сенинъ Адынъ иле аякъларымызнен эзермиз.

⁷ Мен озь яйыма ишанмам, къылычым да мени къуртармаз.

⁸ Сен бизни душманларымыздан къуртараджакъсынъ, бизни кореджек козю олмагъанларны масхара этеджексинъ.

⁹ Алланы эр кунь макътайджакъмыз, Сенинъ Адынъны эбедиен шерефлейджекмиз. Сэла

¹⁰ Амма шимди Сен бизни ташлап, масхара эттинъ. Сен энди бизим ордумызнынъ янында дженкке чыкъмайсынъ.

¹¹ Сен бизни душманларымызнынъ огюнде къачмагъа меджбур эттинъ, бизни кореджек козьлери олмагъанлар бизни талайлар.

¹² Сен бизни, къойларны киби, ашамагъа бердинъ, халкълар арасында бизни даркъаттынъ.

¹³ Озь халкъынъны уджузгъа саттынъ, оларны сатып, зенгин олмадынъ.

¹⁴ Къомшуларымызгъа бизим устюмизден кульмеге ёл бердинъ, этрафтакилер бизим устюмизден кульди ве масхара этти.

¹⁵ Адамлар бизим акъкъымызда шакъа этелер, башкъа халкълар бизге бакъып, башыны саллай.

¹⁶ Эр кунь масхаралыкъ козюм огюнде, бетим утангъанымдан къапалы.

¹⁷ Адамлар мени мыскъыллай ве акъарет этелер, душман ве очь алыджы манъа къыйыш бакъалар.

¹⁸ Буларнынъ эписи башымызгъа кельди, амма биз Сени унутмадыкъ, Сенинъ васиетинъни бозмадыкъ.

¹⁹ Юрегимиз Сенден къайтмады, табанларымыз Сенинъ ёлунъдан таймады.

²⁰ Лякин Сен бизни кийик копеклернинъ топрагъында тар-мар эттинъ, олюм кольгесинен башымызны къапаттынъ.

²¹ Эгер биз Алламызнынъ Адыны унутып, башкъа бир аллагъа къолларымызны узаткъан олсакъ,

²² Алла бунынъ эсабыны сорамаз эдими? О, юрек сырларыны биле де!

²³ Бизни эр кунь Сенинъ ичюн ольдюрелер, къурбанлыкъ къойлар, деп саялар.

²⁴ Я Рабби, уян, не ичюн юкълайсынъ? Тур да, бизни эбедиен ташлама!

²⁵ Не ичюн Сен юзюнъни сакълайсынъ, бизим къайгъымызны ве азаплангъанымызны унутасынъ?

²⁶ Джанымыз топракъкъа тюшти, беденлеримиз ерге япышып къалды.

²⁷ Сен турып, бизге ярдым эт, буюк севгинъ ичюн бизни сатын алып къуртар!