Зебур 41 - Мукъаддес Китап

Къувулгъан адамнынъ къасевети ве теселлиси

¹ Баш чалгъыджы ичюн. Къорах огъулларынынъ маскили.

² Сыгъын чокъракъ сувларына ынтылгъаны киби, джаным Санъа ынтыла, эй, Алла!

³ Аллагъа, Тири Аллагъа джаным сувсады. Не вакъыт келип, Алланынъ огюнде корюнеджегим?

⁴ «Сенинъ Алланъ къайда?» – деп, менден кунь бою сорагъанларда, козьяшым гедже-куньдюз манъа отьмек олды.

⁵ Бу шей акълыма кельгенде, мен джанымны ачам. Мен чокъ адамларнен берабер юрип, Алланынъ Эвине бара эдим, байрам эткен халкънен бирликте къуванчнен къычырып, шукюр эте эдим.

⁶ Эй, джаным, не ичюн бойле тюшкюнсинъ? Не ичюн ичимде сыкъыласынъ? Аллагъа умют багъла! Мен Онъа даа шукюр этеджегим; О, меним Къуртарыджым ве Аллам!

⁷ Джаным ичимде къыйнала. Шунынъ ичюн мен Иордан топрагъында, Хермон ве Мицар дагъларында тургъанымда, Сен акълыма келесинъ, эй, Аллам!

⁸ Буюк теренликлер Сенинъ учансувларынънынъ сеслеринен бири-бирини чагъыралар; Сенинъ бутюн далгъаларынъ ве толкъунларынъ меним башымдан кечтилер.

⁹ Куньдюз РАББИ Озь буюк севгисини косьтерир, гедже Онынъ йыры манъа келир, меним дувам исе аятымнынъ Алласына кетер.

¹⁰ Мен таянгъан Къаягъа, Аллагъа айтаджагъым: «Не ичюн Сен мени унуттынъ? Не ичюн мен душманларымнынъ зулумы астында гъам чекип юрем?»

¹¹ «Сенинъ Алланъ къайда?» – деп, кунь бою душманларым сорай. Олар мени масхара эткенде, кемиклерим сынгъан киби ола.

¹² Эй, джаным, не ичюн бойле тюшкюнсинъ? Не ичюн ичимде сыкъыласынъ? Аллагъа умют багъла! Мен Онъа даа шукюр этеджегим; О, меним Къуртарыджым ве Аллам!