Зебур 39 - Мукъаддес Китап

Месихнинъ итааты акъкъында

¹ Баш чалгъыджы ичюн. Давутнынъ зебуры.

² Мен РАББИнинъ джевабыны сабырлыкънен бекледим; О, манъа якъынлашып, къычыргъанымны эшитти.

³ О, мени къоркъунчлы чукъурдан, балчыкълы батакътан чыкъарып алды. Аякъларымны къаягъа бастырып, адымларымны къатты этти.

⁴ О, агъзыма янъы йырны, Алламызгъа макътавларны къойды. Чокъ адамлар буны корип, къоркъаджакълар, РАББИге ишанаджакълар.

⁵ Не де бахтлыдыр РАББИге ишангъан, макътанчакъларны ве яланджыларны чагъырмагъан адам!

⁶ Я РАББИ, Аллам, Сен чокъ ишлер яптынъ! Санъа ошагъаны ёкъ! Аджайип шейлеринъни ве биз ичюн олгъан ниетлеринъни бильдирмеге истер эдим мен, лякин оларнынъ сайысы ёкъ!

⁷ Къурбан ве бахшышларны Сен истемединъ. Сен меним къулакъларымны ачтынъ. Гуна ичюн къурбан ве бутюнлей якъыладжакъ къурбанларны да Сен истемединъ.

⁸ О вакъыт мен: «Мына, мен келем; бурулгъан кягъытта, китапта меним акъкъымда язылгъан», – дедим.

⁹ Аллам, мен Сенинъ ниетлеринъни беджермеге истейим; Сенинъ Къанунынъ меним юрегимде.

¹⁰ Буюк топлашувда акъикъатынъны айтып бердим, агъызымны ич къапатмадым. Я РАББИ, Сен билесинъ шуны!

¹¹ Сенинъ догърулыгъынъны юрегимде сакъламадым, садыкълыкъ ве къуртулышынъны айтып бердим. Сенинъ севгинъни ве акъикъатынъны буюк топлашувдан гизлемедим.

¹² Я РАББИ, Озь шефкъатынъны менден аяма, Сенинъ севгинъ ве акъикъатынъ мени эр вакъыт сакъласын!

¹³ Мени сайысыз белялар сарып алды, меним гуналарым мени къувып, башыма етти, энди козьлеримни котерип оламайым. Гуналарым башымдаки сачларымдан чокълар; мен рухтан тюштим.

¹⁴ Я РАББИ, мени азат этмеге разы ол, манъа ярдым бермеге ашыкъ, я РАББИ!

¹⁵ Джанымны алмагъа истегенлернинъ эписи утансынлар, оларнынъ бетлери къызарсынлар! Манъа яманлыкъ япып кейфленгенлер арткъа къайтып, масхара олсунлар!

¹⁶ Манъа: «Аха, аха!» – дегенлер озь масхаралыгъындан утанып титресинлер.

¹⁷ Сени къыдыргъанларнынъ эписи Сенде къуванып севинсинлер! Сенинъ къуртарувынъны севгенлер токътамайып: «РАББИ улудыр!» – десинлер!

¹⁸ Мен фукъаре ве ёкъсул олсам да, Рабби мени унутмаз! Сен меним ярдымджым ве къуртарыджымсынъ! Кеч къалма, меним Аллам!