Зебур 35 - Мукъаддес Китап

Алланынъ севгиси ве Къанун бозуджылыкъ

1 Баш чалгъыджы ичюн. РАББИнинъ къулу акъкъында. Давутнынъ зебуры .

¹ Баш чалгъыджы ичюн. РАББИнинъ къулу акъкъында. Давутнынъ зебуры.

² Ичимде юрегим ярамай адамнынъ къанунсыз япкъанлары акъкъында айтып бере: «Онынъ козю огюнде Алладан къоркъмакъ деген шей ёкъ».

³ О, озь-озюне пек чокъ ялтакълана, шунынъ ичюн озь гунасыны тапып оламаз ве ондан нефретленмез.

⁴ Онынъ агъзындан чыкъкъан сёзлер – айнеджилик ве ялан, акъылланмагъа ве эйилик япмагъа даа истемез.

⁵ О, яткъан тёшегинде беляны тюшюне, яхшы олмагъан ёлгъа адым атып, яманлыкътан юзь чевирмей.

⁶ Я РАББИ, Сенинъ севгинъ коклергедже, ишанчлылыгъынъ булутларгъа къадар!

⁷ Догърулыгъынъ – буюк дагълар киби, къарарларынъ исе – тюпсюз теренлик. Инсан ве айванларны Сен къорчалайсынъ, я РАББИ!

⁸ Эй, Алла, не де паалыдыр Сенинъ буюк севгинъ! Къанатларынънынъ кольгесинде адам огъуллары хавфсызлыкъ тапалар.

⁹ Олар Сенинъ эвинънинъ энъ яхшы берекетинден тоялар; Сен оларгъа татлы сувларынъдан ичмеге бересинъ.

¹⁰ Омюр чокърагъы Сендедир; Сенинъ нурунъдан биз ярыкъ коремиз.

¹¹ Сени бильгенлерге севгинъни косьтермеге девам эт, акъикъатынъны догъру юреклилерге бермеге девам эт!

¹² Макътангъан адамнынъ аягъы мени басмасын, гунакярнынъ къолу мени эвсиз къалдырмасын.

¹³ Къанунны бозгъанлар ашагъы тюштилер, олар йыкъылдылар ве турып оламайлар.