Зебур 3 - Мукъаддес Китап

Саба дувасы

¹ Давут озь огълу Авишаломдан къачаяткъан вакъытта бу зебурны айтты.

² Я РАББИ, душманларым не къадар чокълашты! Чокълары манъа къаршы баш котерелер!

³ Чокълары меним джаныма: «Алла оны къуртармаз», – дейлер. Сэла

⁴ Амма Сен, я РАББИ, чевре-четимде къалкъансынъ, меним шуретимсинъ, башымны юкъарыгъа котерген – Сенсинъ.

⁵ РАББИни къычырып чагъырырым, ве Озь мукъаддес дагъындан О мени эшитир. Сэла

⁶ РАББИ мени къорчалагъаны ичюн, мен ятып юкълайым, уянып турам.

⁷ Эр тарафтан манъа къаршы чыкъкъан он бинълердже адамлар юрегиме къоркъу ич кирсетмез.

⁸ Я РАББИ, еринъден тур, къуртар мени, эй, Аллам! Сен эписи душманларымны ченгесине урып, ярамазларнынъ тишлерини сындырырсынъ!

⁹ РАББИ къуртара! Сенинъ разылыгъынъ халкъынънен олсун! Сэла