Зебур 25 - Мукъаддес Китап

Къорчалав акъкъында ялварув

Давутнынъ зебуры .

¹ Я РАББИ, мени акъла, чюнки мен къабаатсыз олып яшадым. Сарсылмайып, РАББИге ишандым.

² Я РАББИ, мени сынап бакъ, тюшюнджелеримни ве юрегимни сынавдан кечир!

³ Сенинъ севгинъ меним козюм огюнде, Мен Сенинъ акъикъатынънен эр вакъыт юрдим.

⁴ Яланджы акъайларнен отурмадым, ичи къара адамларнен де юрмем.

⁵ Яманлыкъ япкъанларнынъ топлашувыны кореджек козюм ёкъ, инсафсызларнен де отурмам.

⁶ Къолларымны къабаатсыз тутарым, Сенинъ къурбан еринъе чыкъарым, я РАББИ.

⁷ Санъа давушнен шукюр этерим, бутюн аджайип ишлеринъни айтып берерим.

⁸ Я РАББИ, Сен яшагъан эвинъни ве Шуретинъ ерлешкен ерини мен севем.

⁹ Гунакярларны ве къанназ адамларны ёкъ эткенде, джанымны ве омрюмни ёкъ этме.

¹⁰ Оларнынъ къоллары яманлыкъ япмагъа азырлар, онъ къоллары къапарларгъа толып-таша.

¹¹ Мен исе къабаатсыз яшайым; къуртар мени ве мерамет эйле.

¹² Меним аякъларым тегиз ёлда тура; адамлар топлашкъан ерлерде РАББИни алгъышлайым!