Зебур 23 - Мукъаддес Китап

Улу Падиша

Давутнынъ зебуры.

¹ Бутюн дюнья ве оны толдургъан барлыкъ, ер юзю ве онда яшагъанларнынъ эписи – РАББИнинъдир!

² О, ерни денъизлер устюнде темеллештирди, дерьялар устюнде оны къатты япып ерлештирди.

³ РАББИнинъ дагъына ким чыкъаджакъ? Онынъ азиз еринде ким тураджакъ?

⁴ Къабаатсыз къолу, темиз юрекли, джаныны бош путларгъа бермеген, ялан айтып ант этмеген адам.

⁵ О, РАББИден яхшылыкъ алыр, Къуртарыджы олгъан Алладан догърулыкъ тапар.

⁶ Мына будыр Оны къыдыргъан адамлар. Эй, Якъупнынъ Алласы, олар бойледир, Сенинъ юзюнъни къыдыргъанлар! Сэла

⁷ Эй, араба къапулары, башынъызны котеринъиз, ачылынъыз, эбедий къапулар! Шуретли Падиша кирсин ичери!

⁸ Кимдир бу шуретли Падиша? Къудретли ве къуветли РАББИдир, дженкте кучьлю РАББИдир!

⁹ Эй, араба къапулары, башынъызны котеринъиз, ачылынъыз, эбедий къапулар! Шуретли Падиша кирсин ичери!

¹⁰ Кимдир бу шуретли Падиша? Ордуларнынъ РАББИси, Одыр шуретли Падиша! Сэла