Зебур 21 - Мукъаддес Китап

Месихнинъ азаплары ве шурети акъкъында

¹ Баш чалгъыджы ичюн. «Аййелет хашшахар» авасында. Давутнынъ зебуры.

² Аллам! Аллам! Сен не ичюн Мени къалдырып кеттинъ? Не ичюн манъа ярдым этмектен, фигъаныма къулакъ асмакътан узакътасынъ?

³ Эй, Аллам, куньдюзлери Сени чагъырам, амма Сен манъа джевап бермейсинъ, геджелери де Сени къыдырам, лякин раат оламайым.

⁴ Сен Мукъаддессинъ, Исраильнинъ макътавлары арасында отурасынъ.

⁵ Баба-деделеримиз Санъа ишанды; олар Санъа ишанды, ве Сен оларны къуртардынъ.

⁶ Олар Сенден ярдым истеди, ве Сен оларны къорчаладынъ. Олар Санъа ишанды ве алданмадылар.

⁷ Лякин мен акъай дегиль, къуртым мен; адамлар мени масхара эте, халкъ исе менден игрене.

⁸ Мени корьген эр кес мени мыскъыллай, башларыны саллап, менден нефретленип, лаф этелер:

⁹ «О, РАББИге ишанды! РАББИ оны сакъласын! РАББИ ондан разы олса, оны къуртарсын!»

¹⁰ Сен мени анамнынъ къурсагъындан чыкъардынъ, анамнынъ къучагъында олгъанымда, Санъа ишанмагъа огреттинъ.

¹¹ Догъулгъанымдан берли мен Санъа берильдим, мен анамнынъ къурсагъындан чыкъкъанымдан берли Сен меним Алламсынъ.

¹² Энди менден узакълашма, чюнки беля якъынлашты, ярдым этеджеклер исе ёкъ.

¹³ Чокъ бугъалар мени сарып алды, къуветли Башан бугъалары этрафымны сарды.

¹⁴ Парчаламагъа азыр олып, окюрген арслан киби, олар манъа агъызларыны ачты.

¹⁵ Мен, сув киби, тёкюльдим, бутюн кемиклерим бугъумларындан айырылды, юрегим ичимде, балавуз киби, ирип битти.

¹⁶ Къуветим, балчыкъ череп парчасы киби, къуруды; тилим танълайыма япышып къалды; Сен мени олюм топрагъына яткъыздынъ.

¹⁷ Мына, копеклер мени сарып алды; ачувлы сюрю этрафымны сарды, олар къолларымны ве аякъларымны тештилер.

¹⁸ Кемиклеримни бирер-бирер саймагъа мумкюн, олар исе манъа тикилип бакъалар.

¹⁹ Урбаларымны озьара болелер, кийимлерим ичюн джереп чекелер.

²⁰ Я РАББИ, менден узакълашма! Сен манъа къувет бересинъ, манъа ярдымгъа ашыкъып кель!

²¹ Джанымны къылычтан къуртар, копек панджасындан бирден-бир аятымны сакъла!

²² Мени арслан агъзындан къуртар, кийик бугъаларнынъ бойнузындан къуртар! Сен манъа джевап бердинъ.

²³ Сенинъ Адынъны агъа-къардашларыма айтып берерим, топлашув ичинде Сени макътарым!

²⁴ Эй, РАББИден къоркъкъанлар, Оны макътанъыз! Эй, Якъупнынъ сою, Оны шуретленъиз! Бутюн Исраиль сою Онъа урьмет косьтерсин!

²⁵ О, фукъаренинъ къайгъысындан игренмеди ве нефретленмеди, ондан юзюни чевирмеди, лякин онынъ чагъыргъанына къулакъ асты.

²⁶ Буюк топлашувда Сени макътайджагъым; Сенден къоркъкъанларнынъ огюнде адакъларымны ерине кетиреджегим.

²⁷ Фукъарелер ашап тойсунлар; РАББИни къыдыргъанлар Оны макътасынлар; юреклеринъиз эбедий яшасынлар!

²⁸ Дюньянынъ дёрт кошесинде яшагъан адамлар РАББИни хатырлап, Онъа къайтаджакълар; бутюн халкъларнынъ къабилелери Санъа бель букеджеклер.

²⁹ Падишалыкъ РАББИнинъкидир, О, халкъларнынъ устюнден укюм эте.

³⁰ Ер юзюнде бутюн сагъламлар ашкъа тойып, Онъа бель букеджеклер. Топракъ ичине киргенлернинъ эписи, озь омрюни сакълап оламагъанларнынъ эписи Онынъ алдында тиз чёкеджеклер.

³¹ Меним эвлятларым Онъа хызмет этеджек, олар эбедиен РАББИнинъки оладжакъ.

³² Олар, келеджекте догъуладжакъ адамларгъа келип, Онынъ акъкъында бутюн акъикъатны ве Онынъ япкъанларыны хабер этеджеклер!