Зебур 20 - Мукъаддес Китап

Енъиш къазангъаны ичюн макътав

¹ Баш чалгъыджы ичюн. Давутнынъ зебуры.

² Я РАББИ, Сенинъ къудретинънен падиша севинир, Сен берген къуртарув ичюн пек къычырып къуваныр!

³ Сен гонълю истегенини онъа бердинъ, агъзындан чыкъкъан тилегини ред этмединъ. Сэла

⁴ Сен оны яхшы бахшышларнен къаршыладынъ, онынъ башына темиз алтындан тадж кийдирдинъ.

⁵ О, Сенден аят истеди, ве Сен онъа асырларгъа узангъан омюрни бердинъ.

⁶ Сен берген къуртулышнен онынъ шурети юксельди, Сен онъа шан-шурет ве улулыкъ бердинъ.

⁷ Сен онъа эбедий бахшышларны бердинъ, Сенинъ юзюнъ онъа къуванч кетирди.

⁸ Падиша РАББИге ишана; Юдже Алланынъ севгисинде олып, о, сарсылмаз.

⁹ Сенинъ къолунъ бутюн душманларынъны тападжакъ, Сенинъ онъ къолунъ Сени кореджек козю олмагъанларны тападжакъ.

¹⁰ Я РАББИ, Сен ачувлангъан вакъытта, оларны янгъан фурунгъа чевиреджексинъ. РАББИнинъ гъазабы оларны ютаджакъ, атеш оларны ёкъ этеджек.

¹¹ Сен оларнынъ несилини ер юзюнден ёкъ этеджексинъ, оларнынъ эвлятларыны инсанларнынъ арасындан силеджексинъ.

¹² Олар Санъа къаршы яманлыкъ япаджакъ олсалар, къара ниетлерине иришип оламайджакълар.

¹³ Сен оларны къачып къуртулмагъа меджбур этеджексинъ, яйларынъны чекип, бетлерини нишангъа аладжакъсынъ.

¹⁴ Тур, я РАББИ, бутюн кучюнъни косьтер! Сенинъ къудретинъ акъкъында йырлайджакъмыз ве чалгъы чаладжакъмыз!