Зебур 19 - Мукъаддес Китап

Енъиш дувасы

¹ Баш чалгъыджы ичюн. Давутнынъ зебуры.

² Агъыр куньде РАББИ сени эшитсин, Якъупнынъ Алласынынъ Ады сени къорчаласын!

³ О, мукъаддес мескенинден санъа ярдым ёлласын, Сиондан санъа такъат берсин!

⁴ О, сенинъ бутюн бахшышларынъны хатырласын, бутюнлей якъыладжакъ къурбанларынъны къабул этсин! Сэла

⁵ Алла санъа гонълюнъ истегенини берсин, бутюн муратларынъны беджерсин!

⁶ Биз Сенинъ къуртарувынъ ичюн къычырып къуванаджакъмыз, Алламызнынъ Адынен байракъ котереджекмиз. РАББИ бутюн истеклеринъни беджерсин!

⁷ Энди ачыкъ-айдын бильдим ки, РАББИ Озь Месихини къуртараджакъ; Онъ къолунынъ къуртарыджы кучюнен мукъаддес коклерден онъа джевап береджек.

⁸ Базылары – дженк арабаларына, даа базылары – атларына ишаныр. Бизлер исе – РАББИмизнинъ Адына, Алламызнынъ Адына ишанырмыз.

⁹ Олар салланып тюштилер, бизлер исе котерилип тик турамыз.

¹⁰ Я РАББИ, падишаны къуртар, Сени чагъыргъан кунюмизде бизге джевап бер!