Зебур 18 - Мукъаддес Китап

Алланынъ Шурети Онынъ къанунларында ве О яраткъан шейлеринде корюне

¹ Баш чалгъыджы ичюн. Давутнынъ зебуры.

² Коклер Алланынъ шуретини бильдире, кок къуббеси Онынъ яраткъаны акъкъында хабер бере.

³ Коклер куньден-куньге лаф эте, геджелери олар бильги сачалар.

⁴ Эр бир тильде, эр бир шиведе оларнынъ сеси эшитиле.

⁵ Оларнынъ сеси бутюн ер юзюнден кече, оларнынъ хабери дюньянынъ четине ете. Алла кунеш ичюн анда мескен япты;

⁶ кунеш, никях одасындан киев киби, чыкъа, батыр киби, къуванып, озь месафесини чапып кече.

⁷ Онынъ чыкъкъан ери – кокнинъ четиндедир, ёлу исе башкъа четине бара, сыджагъындан ич бир шей сакъланмаз.

⁸ РАББИнинъ Къануны мукеммельдир, о, джангъа кучь бере. РАББИнинъ шаатлыгъы догърудыр, о, саде адамгъа акъыл бере.

⁹ РАББИнинъ къаиделери догърудыр, олар юрекни къувандыра. РАББИнинъ эмири темиздир, о, козьлерни ярыкълата.

¹⁰ РАББИден къоркъмакъ – темиз ве эбедийдир, РАББИнинъ къарарлары керчек ве бутюнлей догърудыр.

¹¹ Олар алтындан, чокъ ве темиз алтындан зияде истек догъура, олар балдан, солакъ балынынъ тамчысындан да татлыдыр.

¹² Сенинъ къулунъны да олар сакълай, оларгъа бойсунгъан адам буюк мукяфат алыр.

¹³ Ким озь янълышларыны коре билир? Гизли хаталардан мени темизле!

¹⁴ Биле-биле япылгъан гуналардан Озь къулунъны сакъла, олар манъа аким олмасын. О вакъытта мен къабаатсыз, буюк бозукълыкътан темиз олурым.

¹⁵ Агъзымдан чыкъкъан сёзлернен, юрегимден кечкен тюшюнджелернен разы ол, я РАББИ! Сен – меним таянгъан Къаям ве Къуртарыджымсынъ!