Зебур 17 - Мукъаддес Китап

Давутнынъ йыры

¹ Баш чалгъыджы ичюн. РАББИнинъ къулу акъкъында. РАББИ Давутны эписи душманларындан ве Шаулнынъ къолундан къуртаргъан куню, Давут РАББИге бу йырны йырлады:

² Сени севем, я РАББИ! Сен меним къуветимсинъ!

³ РАББИ – меним къаям, меним къалем ве меним къуртарыджымдыр! Аллам – меним къаям, мен Онъа умют багълайым. О – меним къалкъаным, къуртулышымнынъ къувети, меним юксек, енъильмез керменим!

⁴ Макътавгъа ляйыкъ РАББИмни чагъыраджагъым, ве О, мени душманларымдан къуртараджакъ.

⁵ Олюм йиплери мени сарып алды, акъсызлыкънынъ дерьялары мени зияде къоркъузды.

⁶ Джеэннем зынджыры мени багълады, олюм тузакълары мени якъалады.

⁷ Башым беляда къалгъанда, РАББИмни чагъырдым, Алламдан имдат истедим. Сарайындан О, сесимни эшитти, яйгъаргъаным Онынъ къулагъына барып етти.

⁸ О, гъазаплангъаны ичюн, ер юзю тепренип титреди, дагъларнынъ темеллери сарсылып, еринден къыбырдады.

⁹ Бурнундан тютюн чыкъты, агъзындан эр шейни ёкъ этиджи атеш фышкъырды, алевленген комюр сепильди.

¹⁰ О, коклерни ачып, ашагъы тюшти, аякъларынынъ тюбюнде къаранлыкъ эди.

¹¹ Керувнынъ устюне минип, учты, ельнинъ къанатларында авеледи.

¹² Озюни къаранлыкънен орьтти, къара, сувдан агъырлашкъан булутларгъа сарылды.

¹³ Онынъ къаранлыгъы огюнде йылтырагъан нур джайыла, ондан бурчакъ ве комюр алеви чыкъа.

¹⁴ РАББИ коклерден гудюрдеди, Юдже Алланынъ сеси котерильди, бурчакъ ве атешли комюр ёллады.

¹⁵ О, окълар атып, душманларыны дагъытты, йылдырымнен оларны шашмалатты.

¹⁶ РАББИнинъ къоркъунчлы сесинден, Онынъ ачувлы нефесинден денъизнинъ сув башы ачылды, ер юзюнинъ темеллери корюнди.

¹⁷ Юкъарыдан элини узатып, О, мени алды, терен сувлардан чыкъарды,

¹⁸ кучьлю душмандан сакълады, мени кореджек козю олмагъанлардан, менден кучьлю душманларымдан къорчалады.

¹⁹ Башыма беля тюшкенде, олар манъа уджюм эттилер, лякин РАББИ манъа ярдым этти.

²⁰ О, мени чаресиз алдан чыкъарды, менден разы олгъаны ичюн, мени къуртарды.

²¹ РАББИ инсафлыгъыма коре манъа мукяфат берди, эллеримнинъ темизлигине коре манъа къайтарды.

²² Мен РАББИнинъ эмирлерини тута эдим, Алламнынъ огюнде яманлыкъ япмадым.

²³ Къарарларынынъ эписи – козюм огюнде, низамнамелеринден чекильмедим мен.

²⁴ Онынъ огюнде къабаатсыз эдим, гуна япмакътан сакъындым.

²⁵ РАББИ инсафлыгъыма коре манъа мукяфат берди, Онынъ огюнде эллеримнинъ темизлигине коре манъа къайтарды.

²⁶ Ишанчлы адамнен Сен ишанчлысынъ, къабаатсыз адамнен – бутюнлей догърусынъ.

²⁷ Темиз адамнен – темизсинъ, яланджыгъа яланына коре бересинъ.

²⁸ Алчакъгонъюллини къуртарасынъ, макътангъан адамны исе алчакълатасынъ.

²⁹ Сен лампадыма нур бересинъ! РАББИ олгъан Аллам къаранлыгъымны айдынлата.

³⁰ Сенинъ къуветинънен мен ордуларны къырам, Алламнен берабер диварларгъа чыкъам.

³¹ Алланынъ ёлу къусурсыздыр! РАББИнинъ сёзю къавийдир! Онъа умют багълагъанларнынъ эписини О, къорчалай!

³² РАББИден гъайры башкъа Алла бармы? Алламыздан гъайры башкъа сарсылмаз къая бармы?

³³ Алла манъа кучь бере, догъру ёлны косьтере.

³⁴ Аякъларымны джейран киби тез япа, юксеклерге мени къоя.

³⁵ Къолларымны дженк этмеге азырлай, эллеримни тунч яйны тартмагъа огрете.

³⁶ Манъа берильген къуртарувынъ – къалкъан кибидир, онъ къолунъ манъа ярдым эте, мераметинъ мени къуветлештире.

³⁷ Аякъ тюбюмдеки ёлны кениш япасынъ, аякъларыма таймагъа ёл бермейсинъ.

³⁸ Душманларымнынъ пешинден къувалайым, артларындан етем. Олар тамамынен гъайып олмагъандже, артыма къайтмайым.

³⁹ Мен оларны агъыр яралайым. Олар бир даа котерильмейлер, аягъым астына йыкъылалар.

⁴⁰ Сен манъа дженк этмек ичюн кучь бересинъ, манъа къаршы исьян котергенлерни огюмде ерге йыкъасынъ.

⁴¹ Душманларымны менден къачмагъа меджбур этесинъ, менден нефретленгенлерни ёкъ этем.

⁴² Олар ярдым истейлер, амма оларны къуртаргъан кимсе ёкъ. РАББИни чагъыралар, амма О, оларны эшитмей.

⁴³ Мен оларны топракъкъа айландырам, ель огюнде тоз киби япам, сокъакъ чамуры киби таптап эзем.

⁴⁴ Сен мени халкъымнынъ исьянындан къорчаладынъ. Мени тюрлю миллетлерге башлыкъ этмек ичюн къойдынъ. Мен бильмеген халкъ манъа хызмет эте.

⁴⁵ Олар эмирлеримни эшитип, шу ань беджерелер; ябанджылар манъа ялтакъланып бойсуналар.

⁴⁶ Ябанджыларнынъ отьлери патлай, къалтырап, сакълангъан ерлеринден чыкъалар.

⁴⁷ РАББИ яшай! Онъа, меним Къаяма, шукюрлер олсун! Меним Алламны, Къуртарыджымны, Къаямны шуретленъиз!

⁴⁸ Алла, Сен меним ичюн интикъам аласынъ, халкъларны манъа бойсундырасынъ,

⁴⁹ мени душманларымдан къуртарасынъ. Манъа къаршы чыкъкъанлардан Сен мени юксельттинъ, мераметсиз адамдан мени къуртардынъ!

⁵⁰ Шунынъ ичюн, РАББИ, чешит тюрлю миллетлернинъ огюнде Санъа шукюрлер этеджегим, Адынъа шан йырларыны йырлайджагъым!

⁵¹ Сен Озь падишанъны къуртарасынъ, Озь Месихинъе Давуткъа ве эвлятларына эбедиен Сенинъ севгинъни косьтересинъ!