Зебур 16 - Мукъаддес Китап

Раббиге умют

Давутнынъ дувасы.

¹ Я РАББИ, меним акъикъатымны динъле, фигъаныма къулакъ ас, ялансыз дудакъларымдан чыкъкъан дувамны къабул эт!

² Озюнъ мени суд эт, Сенинъ козьлеринъ акъикъаткъа бакъсын!

³ Сен юрегимни сынадынъ, гедже манъа кельдинъ. Сен мени сынадынъ ве ич бир яманлыкъ тапмадынъ. Дудакъларым гуна япмайджакъ, къарарына кельдим.

⁴ Сенинъ сёзлеринъе коре, мен адамларнынъ ишлеринде зулумлыкъ ёлларындан озюмни сакъладым.

⁵ Адымларымны Сенинъ ёлларынъда туттым, меним аякъларым таймады.

⁶ Санъа ялварам мен, эй, Алла, Сен мени эшитеджексинъ. Къулагъынъны ас манъа, сёзюмни динъле!

⁷ Аджайип севгинъни косьтер! Сен онъ къолунънен Санъа ишангъанларны Санъа къаршы чыкъкъанлардан къуртарасынъ!

⁸ Козь бебеги киби, мени къорчала, Озь къанатларынънынъ кольгесинде мени сакъла

⁹ манъа уджюм эткен яман адамлардан, эр ерден джанымны сарып алгъан душманларымдан!

¹⁰ Оларнынъ юрегини ягъ баскъан, агъызлары къопайып макътаналар.

¹¹ Эр адымда мени сарып алып, мени ерге урмакъ ичюн, козьлерини манъа тиктилер.

¹² Олар парча-парча этмеге истеген арслангъа, гизли ерде яткъан арслан баласына ошайлар.

¹³ Я РАББИ, тур! Оларгъа уджюм этип, оларны ерге йыкътыр! Озь къылычынънен джанымны ярамайлардан къуртар!

¹⁴ Я РАББИ, бойле адамлардан, шу дюньянынъ адамларындан Озь къолунънен мени къуртар! Олар озь пайыны бу дюньяда алдылар. Сен оларнынъ къурсакъларыны анбарларынъдан толдурасынъ: огъуллары токъ, къалымты исе балаларына етеджек!

¹⁵ Мен исе акъикъатта Сенинъ бетинъе бакъаджагъым, уянгъанымда, Сенинъ сыфатынъа тояджагъым.