Зебур 15 - Мукъаддес Китап

Месих акъкъында пейгъамберлик

Давутнынъ миктамы.

¹ Эй, Аллам, мени сакъла, Санъа умют багълайым.

² Мен РАББИге дедим: «Сен меним Раббимсинъ, Сенден башкъа мен ичюн яхшы шей ёкъ».

³ Ер юзюнде олгъан азиз адамларгъа, асылзаделерге, оларнынъ эписине меним бутюн муратларым.

⁴ Башкъа аллаларгъа инангъанларнынъ дертлери чокълашсын! Олар къан тёкип, ичерлик бахшышларыны кетирелер; мен исе буны япмам, агъзымдан оларнынъ адлары биле чыкъмаз.

⁵ РАББИ – меним къысметим, меним къадирим; башымнынъ язысы Сенинъ къолунъда.

⁶ Манъа ольчеп берильген топракъкъа не гузель ерлер тюшти, меним топракъ пайым манъа гузель корюне.

⁷ Манъа акъыл берген РАББИни алгъышлайым, геджелери биле виджданым мени огрете.

⁸ РАББИм эр вакъыт козюм огюнде. О, онъ тарафымда, мен ич бир вакъыт сарсылмам.

⁹ Шунынъ ичюн юрегим къувана, тилимден севинч тёкюле, беденим де хавфсызлыкъта раат олур.

¹⁰ Сен олюлер дюньясында джанымны ташлап кетмезсинъ, Озь азизинъе мезарда чюрюмеге ёл бермезсинъ.

¹¹ Сен аят ёлуны манъа бильдирирсинъ. Сенинъ янынъда адам къуванчкъа тола, Сенинъ онъ къолунъда эр вакъыт зевкъ-сефа.