Зебур 149 - Мукъаддес Китап

Макътав гимни

¹ Эльхамдюлилля! РАББИге янъы бир йыр айтынъыз! Азизлернинъ топлашувында Онъа макътавлар олсун!

² Исраиль озюнинъ Яратыджысындан севинсин, Сион огъуллары озь Падишасындан къувансын!

³ Оюнгъа тюшип Онынъ Адыны макътасынлар, даре ве сантыр чалып, Онъа йырласынлар!

⁴ РАББИ Озь халкъынен разы, алчакъгонъюллилерни къуртарып шерефлер!

⁵ Азизлер шурет ичинде тантана этсинлер, озь ятакъларында къычырып къувансынлар!

⁶ Агъызларында Аллагъа шуретлер олсун, къолларында исе – эки агъызлы къылыч!

⁷ Олар миллетлерден интикъам алыр, халкъларгъа джезасыны берер,

⁸ падишаларны зынджырларнен, асылзаделерни демир бугъавларнен багълар,

⁹ оларны, язылгъаны киби, укюм этерлер! Бу шереф Онынъ бутюн азизлерине берилир! Эльхамдюлилля!